Қозоғистон бош вазири Канат Бозумбаев ҳалокатга учраган Azerbaijan Airlines (AZAL) самолёти учувчиларининг аввал эълон қилинган мулоқотлари ҳақиқий эмаслигини айтди.

Мен тармоқларда тарқалган ёзувни тингладим, менимча, бу кўпроқ ерда олиб борилган суҳбатлар эди. Мен у ерда экипаж аъзоларининг суҳбатларини эшитмадим. Қора қутида капитан, учувчи ва экипаж аъзолари олиб борган барча мулоқотлар мавжуд.  Шундан келиб чиқиб, мен бу тергов гуруҳимиздан сизиб чиқмаган деган хулосага келдим, деди бош вазир.

Бозумбаевнинг сўзларига кўра, эълон қилинган маълумотлар бортдаги ўз-ўзидан ёзиш қурилмаларидан олинган маълумотлардан фарқ қилади.

Агар биз маълумотлар сизиб чиқишини қора қутилар расшифровкаси сифатида баҳоламасак, бу “тарқалиш” манбасини қидиришнинг нима кераги бор? Интернетда кимдир бирор нарса эълон қилгани, бу ҳақиқат дегани эмас. Эълон қилинган нарсада катта фарқ бор. Шунинг учун расмий манбаларни кутинг, деди у.

Вазир, шунингдек, Қозоғистон, Озарбайжон, Россия ва Бразилия экспертлари автоматик тарзда ёзувчи қурилмаларни ўқиш учун тенг имкониятга эга эканлигини эслатди. Лайнер парчалари халқаро экспертлар томонидан ҳам кўриб чиқилди.

Жорий йилнинг 15 январь куни База Telegram каналида учувчиларнинг Россиядаги диспетчерлар билан суҳбатларининг тўлиқ тафсилотлари акс этган материал эълон қилинган эди. Унга кўра, диспетчерларга бортдаги кислород баллони портлагани ва гидравлика ишдан чиққани ҳақида хабар берилган.

Аввалроқ Қозоғистон Транспорт вазирлиги терговнинг расмий маълумотлари олинмагунча База маълумотларига изоҳ беришдан бош тортганди.

Қозоғистондаги авиаҳалокат

25 декабрь куни Бокудан Грознийга учаётган Озарбайжон ҳаво йўллари (AZAL)нинг Embraer самолёти Оқтов яқинида ҳалокатга учради. Самолёт бортида 67 киши, жумладан, беш нафар экипаж аъзоси бўлган. Улардан 42 нафари Озарбайжон, 16 нафари Россия, 6 нафари Қозоғистон, 3 нафари Қирғизистон фуқароларидир. Ҳодиса оқибатида жами 38 киши ҳалок бўлди.

29 декабрь куни барча 17 халқаро эксперт, жумладан, Халқаро фуқаро авиацияси ташкилоти (ICAO), Бразилия авиаҳалокатларни текшириш ва олдини олиш маркази (SENIPА), Давлатлараро авиация қўмитаси (IAS) ва Embraer ишлаб чиқарувчи компания вакиллари AZAL самолёти ҳалокати сабабларини текшириш учун Оқтовга етиб келди.

30 декабрь куни Қозоғистон Озарбайжон самолётининг регистраторларини SENIPA'га ўрганиш учун юборди.

Озарбайжон президенти Илҳом Алиев самолёт Грозний яқинида ташқи таъсир оқибатида шикастланган ва бошқарувни йўқотганини маълум қилган.

“Фактлар шундан иборатки, Озарбайжон фуқаролик самолёти Россия ҳудудида, Грозний шаҳри яқинида ташқи таъсир оқибатида шикастланган ва деярли бошқарувни йўқотган. Шунингдек, бизнинг самолётимиз радиоэлектрон кураш воситалари ёрдамида бошқариб бўлмайдиган ҳолатга туширилганини ҳам биламиз. Бу самолётга етказилган биринчи зарар ҳисобланади”, деди у Озарбайжон телевидениесига берган интервьюсида.