Оқтов яқинида ҳалокатга учраган Azerbaijan Airlines (AZAL) йўловчи самолётининг қора қутилари Бразилиядан Қозоғистонга қайтарилди. У ҳалокат ҳақида хулоса бериш учун махсус комиссияга топширилган.

Қозоғистон транспорт вазирлиги авиаҳалокат бўйича тергов комиссияси барча фактлар ва материалларни батафсил ўрганганидан сўнг дастлабки ҳисоботни эълон қилади. Ҳужжатда “текширув жараёни бўйича аниқланган фактик маълумотлар тақдим этилади”.

Жорий йилнинг 14 январь куни Россия ТИВ раҳбари Сергей Лавров Озарбайжон самолётининг қора қутилари “аллақачон кўплаб қизиқарли маълумотлар берганини” айтди.

“Бразилияда бўлиб ўтган махсус учрашувда қора қутилар очилди ва уларнинг мазмуни аллақачон кўплаб қизиқарли маълумотларни тақдим этди. Бу маълумотлар яна бир бор тўлиқ терговни кутиш зарурлигини тасдиқлайди”, дейди Лавров.

У айни дамда қора қутилардан олинган маълумотлар билан тасдиқланмаган ахборотдан фойдаланиб, ОАВларда вазиятни кескинлаштирмасликка чақирди.

Вазирнинг аниқлик киритишича, Озарбайжон билан ҳозирги “тузилмавий муносабатлар” ҳар қандай масалани тезкор ҳал қилиш имконини беради. Расмийга кўра, бу иккинчи Қорабоғ уруши пайтида Россия вертолётининг хато туфайли уриб туширилиши ёки яқинда Озарбайжон самолётининг Оқтовда ҳалокатга учраши каби ҳодисалар юз берганда, барча фактларни ўрганиш асосида амалга оширилади.

“Биз ҳамкасбим ва дўстим, Озарбайжон ТИВ раҳбари Жайхун Байрамов билан жуда яқин ҳамкорлик қилмоқдамиз. Бизда БМТ, ЙХҲТдан тортиб иқлим мавзуларигача ташқи сиёсат соҳасида муҳокама қилинаётган барча масалалар бўйича узоқ муддатли маслаҳатлашувлар режаси мавжуд”, дея хулоса қилди вазир.

Қозоғистондаги авиаҳалокат

25 декабрь куни Бокудан Грознийга учаётган Озарбайжон ҳаво йўллари (AZAL)нинг Embraer самолёти Оқтов яқинида ҳалокатга учради. Самолёт бортида 67 киши, жумладан, беш нафар экипаж аъзоси бўлган. Улардан 42 нафари Озарбайжон, 16 нафари Россия, 6 нафари Қозоғистон, 3 нафари Қирғизистон фуқароларидир. Ҳодиса оқибатида жами 38 киши ҳалок бўлди.

29 декабрь куни барча 17 халқаро эксперт, жумладан, Халқаро фуқаро авиацияси ташкилоти (ICAO), Бразилия авиаҳалокатларни текшириш ва олдини олиш маркази (SENIPA), Давлатлараро авиация қўмитаси (IАC) ва Embraer ишлаб чиқарувчи компания вакиллари AZAL самолёти ҳалокати сабабларини текшириш учун Оқтовга етиб келди.

30 декабрь куни Қозоғистон Озарбайжон самолётининг регистраторларини SENIPA’га ўрганиш учун юборди.

Озарбайжон президенти Илҳом Алиев самолёт Грозний яқинида ташқи таъсир оқибатида шикастланган ва бошқарувни йўқотганини маълум қилган.

“Фактлар шундан иборатки, Озарбайжон фуқаролик самолёти Россия ҳудудида, Грозний шаҳри яқинида ташқи таъсир оқибатида шикастланган ва деярли бошқарувни йўқотган. Шунингдек, бизнинг самолётимиз радиоэлектрон кураш воситалари ёрдамида бошқариб бўлмайдиган ҳолатга туширилганини ҳам биламиз. Бу самолётга етказилган биринчи зарар ҳисобланади”, деди у Озарбайжон телевидениесига берган интервьюсида.