Қозоғистоннинг бир қанча ҳудудларида картошка нархи кескин ошиб кетди. Ҳукумат учинчи мамлакатларга сабзавот экспортини олти ойга чеклади. Бу ҳақда Tengrinews хабар берди.
Қўшни давлатлар, хусусан, Ўзбекистон томонидан талаб ошгани ва экспорт нархлари юқорилиги сабабли жорий йилда картошка экспорти 1,5 баробар ошиб, 411 минг тоннадан 605 минг тоннага етди. Кучли талаб ички бозорга ҳам таъсир кўрсатди. Охирги ҳафтада экспортга йўналтирилган ишлаб чиқарувчиларда нархларнинг кескин ўсиши (170 тенгедан 270 тенгега, тахминан, 4 мингдан 6,5 минг сўмгача) қайд этилди, дейилади ҳукумат хабарида.
Қозоғистонда картошканинг бир килоси 400 тенгегача (9,5 минг сўмдан зиёд) ва ундан юқори сотилмоқда. Жумладан, Оқтўбе шаҳрида январь ойи бошида бир килоси 200 тенгедан қиммат бўлмаган. Охирги ҳафтада нарх икки баробар ошди. Бугунги кунда супермаркетларда бир килограмм картошка 388 тенгедан (9 400 сўм атрофида) сотилмоқда. Ҳатто сифати бузилган картошкаларнинг ҳам нархи ошган. Сотувчилар буни маҳсулотнинг ҳар бир партияси олдингисидан қимматроқ тушиши билан изоҳлаган.
Ички бозорда нархни барқарорлаштириш, унинг асоссиз оширилишига йўл қўймаслик учун картошкани учинчи давлатларга олиб чиқиш 6 ойга чекланмоқда.
Ушбу чора Евросиё иқтисодий иттифоқи (ЕОИИ) мамлакатларига нисбатан қўлланмайди, бироқ бу йўналишдаги экспорт назорат остида бўлади. Юзага келган вазиятни инобатга олган ҳолда, 16 январдан бошлаб экспорт учун фитосанитария сертификатларини бериш бутунлай тўхтатилди, дейди ҳукумат вакиллари.
Қишлоқ хўжалиги вазирлигига кўра, бугунги кунда мавжуд захиралар 2025 йил эрта ҳосилигача ички эҳтиёжни тўлиқ қоплаш учун етарли. Захиралар, 19 январь ҳолатига кўра, савдо тармоқларидаги захираларни ҳисобга олмаганда 850 минг тоннадан ортиқ.
2024 йилда картошканинг ялпи ҳосили 2,9 миллион тоннани (шу жумладан, эрта ҳосил — 300 минг тоннани) ташкил этган. Импорт эса 56 минг тонна бўлган. Ўтган йилнинг август—декабрь ойларида 844 минг тонна картошка истеъмол қилинган, 620 минг тонна экспорт қилинган. 2025 йил (январь—апрель) учун истеъмолнинг прогноз ҳажми — 675 минг тонна.
Изоҳ (0)