Александр Огородников Беларуснинг Ўзбекистондаги янги элчиси этиб тайинланди. Александр Лукашенко 14 январь куни тегишли қарор қабул қилди.
У тайинловга қадар 2022 йил май ойидан буён саноат вазирининг биринчи ўринбосари лавозимида ишлаб келаётганди. Александр Огородников Беларуснинг Ўзбекистондаги элчиси лавозимида 2018 йил апрелидан буён ишлаб келаётган Леонид Маринич ўрнини эгаллайди.
Александр Лукашенко янги элчини тайинлар экан, Ўзбекистонда фаолият учун катта майдон очилаётганини таъкидлади.
“Президент Мирзиёев билан муносабатларимиз яхши. Лекин улар билан ишлаш керак. Ишончим комилки, у ерда катта фаолият майдони бор”, деди Беларусь етакчиси.
Ўзбекистондан ташқари, Беларуснинг Қозоғистон, Озарбайжон, Туркиядаги янги элчилари ҳам тайинланди.
Беларусь президенти администрацияси раҳбари Дмитрий Крутой Александр Лукашенконинг “ташқи савдодаги икки кит” — Россия ва Хитой билан бир қаторида МДҲ мамлакатлари билан алоқаларни мустаҳкамлаш вазифасини эслатди. “Улар орасида катта учлик — Қозоғистон, Озарбайжон ва Ўзбекистон алоҳида ажралиб туради”, деди у.
Изоҳ (0)