Қозоғистон президенти Қосим-Жўмарт Тўқаев энергия тақчиллиги кучайиб бораётган шароитда мамлакатда биринчи АЭС қурилишини тезлаштириш зарурлигини билдирди.
У ҳукуматга ядро кластерини ташкил этиш мақсадида атом саноатини ривожлантиришнинг узоқ муддатли режаларини ишлаб чиқишни топширди.
Ўсиб бораётган энергия тақчиллиги шароитида биринчи АЭС қурилишини тезлаштириш ва умуман олганда, мамлакатда ядро кластерини яратишга киришиш лозим. Бу мамлакатимиз тараққиётини таъминлаш учун муҳим вазифадир, деди Тўқаев ҳукуматнинг кенгайтирилган мажлисида.
У ҳукумат ва парламентдан иккинчи атом станцияси қуриладиган жой бўйича таклифлар кутаётганини қўшимча қилди.
Яна бир бор таъкидлайман: мамлакатимизга ядро энергияси зарур, бусиз Қозоғистоннинг изчил ривожланиши шубҳа остида қолади, дея сўзини давом эттирди у.
2024 йил ноябрь ойида Қозоғистонда ўтказилган референдумда иштирокчиларнинг 71,12 фоизи мамлакатдаги биринчи АЭС қурилишини қўллаб-қувватлади. АЭСни 2035 йилгача мамлакатнинг жануби-шарқида, Улкен қишлоғи яқинида қуриш режалаштирилмоқда (жанубий ҳудудларда республиканинг бошқа қисмларига қараганда энергия танқислиги юқорироқ). Лойиҳанинг қиймати 10-12 миллиард доллар атрофида баҳоланмоқда.
Қозоғистон етакчиси АЭС қурилишига жаҳон компаниялари халқаро консорсиумини жалб қилишни энг мақбул вариант сифатида баҳолади. Лойиҳада иштирок этиш учун Россиянинг “Росатом” давлат корпорацияси, Хитойнинг CNNC, Жанубий Кореянинг КҲНП ва Франциянинг EDF компаниялари даъвогарлик қилмоқда.
Қозоғистон Миллий иқтисодиёт вазири ўринбосари Арман Касенов мамлакатда атом электр станцияси муддатли тўлов эвазига қурилиши мумкинлигини айтган эди.
Изоҳ (0)