Жиноятчилар орасида “Дикий Арман” номи билан танилган Арман Жумагелдиев Қозоғистонда 2022 йил январь ойида оммавий тартибсизликлар уюштирганликда айбланиб, 20 йилга озодликдан маҳрум қилинди. Бу ҳақда Tengrinews хабар берди.
Барча суд мажлислари ва ҳукмлар ёпиқ режимда ўтказилди. Суд қарори билан Жумагелдиев уюшган жиноий гуруҳни ташкил этиш ва унга раҳбарлик қилиш, қуролли босқинчилик, оммавий тартибсизликларни уюштириш, одам ўғирлаш ва қонунга хилоф равишда озодликдан маҳрум қилишда айбдор деб топилди. Суд “Дикий Арман” лақабли шахсни 20 йил муддатга озодликдан маҳрум этиш жазосига ҳукм қилди.
“Оммавий тартибсизликларнинг бошқа иштирокчилари — Жумагелдиев тўдаси аъзолари (жами 13 киши) га 10 йилдан 15,5 йилгача, тўда таркибига кирмаган бошқа иштирокчилар эса 1,5 йилдан 7 йилгача озодликдан маҳрум этилди”, дейилади хабарда.
Собиқ депутат, тадбиркор Қайрат Қудайберген 2022 йил 23 апрелда Жумагелдиев билан бирга январдаги оммавий тартибсизликларда иштирок этиш учун одамларни йиғишда гумонланиб ҳибсга олинган. Тергов маълумотларига кўра, улар тўплаган гуруҳ майдонга чиқиб, у ерда намойишчиларни Жумагелдиев атрофида бирлаштиришга, майдонда тезкор штаб ташкил этишга ва ҳукуматга ягона талабларни қўйишга ҳаракат қилган.
“Amanat” партияси (собиқ “Нур Отан”) Қудайбергенни ўз сафидан чиқариб юборган ва Олмаота Маслаҳати депутати мандатидан маҳрум қилган. Миллий хавфсизлик қўмитаси бешинчи департаментининг собиқ раҳбари полковник Руслан Искаков январь воқеалари пайтида “Дикий Арман” координатори бўлган. Қайрат Қудайберган 8 йилга, Руслан Искаков эса 15 йил 6 ойга озодликдан маҳрум этилди.
“Дикий Арман”нинг ҳибсга олингани 7 январь куни маълум бўлганди. У 5 кишидан иборат жиноий гуруҳи билан биргаликда махсус операция давомида Олмаотада қўлга олинган. Қўлга олиш чоғида гумонланувчилардан турли марка ва калибрли тўртта ярим автомат тўппонча, ўқ-дорилар, совуқ қурол ва зирҳли автомашина мусодара қилинган.
Бош прокуратура маълумотига кўра, тўда аъзолари январь воқеаларида 24 кишини ўғирлаб кетган ва ушлаб турган, улардан бири вафот этган. Шунингдек, ҳуқуқ-тартибот идоралари ходимларидан қуроллар ўғирлаб кетилган.
“Қонли январь” воқеалари
2022 йил январь ойи бошида Қозоғистонда оммавий тартибсизликлар юз берди, уларнинг иштирокчилари полиция ва ҳарбий хизматчиларга ҳужум қилди. Тўқаев ёрдам сўраб КХШТга мурожаат қилди. 7 январга келиб вазият барқарорлашди, 19 январдан бутун мамлакат бўйлаб фавқулодда ҳолат бекор қилинди. Расмий маълумотларга кўра, ушбу ҳодисалар оқибатида 238 киши ҳалок бўлган, 4,5 мингдан ортиқ киши жароҳатланган.
Изоҳ (0)