Қозоғистон президенти Қосим-Жўмарт Тўқаев Россия армияси енгилмас экани, Украина эса Ғарб ёрдамида ҳеч бўлмаганда мағлубиятга учрамасликка интилётганини айтди. Бу ҳақда у Ana Tii газетасига берган интервьюсида маълум қилди.
Тўқаевнинг сўзларига кўра, АҚШнинг сайланган президенти Дональд Трамп телефон орқали суҳбат чоғида унинг уруш борасидаги қарашлари билан қизиққан.
“Вазият ўзига хос: Россия ҳарбий жиҳатдан енгилмас, Украина эса Ғарб иттифоқчилари ёрдамида урушда туришга, ҳеч бўлмаганда, мағлуб бўлмасликка умид қилмоқда. Шунинг учун у муаммонинг гўят мураккаблигини таъкидлади, унинг ечими қарама-қарши давлатлар раҳбарларининг ва, албатта, жаҳон қудрати етакчиси сифатида Трампнинг хоҳиш-иродасига боғлиқ”, деди Қозоғистон президенти.
У Қозоғистон доимо тинчликка эришиш учун музокаралар тарафдори бўлганини таъкидлади. Тўқаев, шунингдек, Остона “воситачиликка даъвогар эмас”лигини, аммо “халқаро муаммоларни ҳал этишда доим ёрдамга шай” эканини билдирди.
Россия делегациясининг Қозоғистонга ташрифини муҳокама қилар экан, у Россия президенти Владимир Путинни “тажрибали давлат арбоби” деб атади. Унинг фикрича, Путин “Қозоғистоннинг ўзига хослигини ва мамлакатнинг Марказий Осиё минтақасидаги энг йирик иқтисодиёт сифатидаги муҳим аҳамиятини яхши англайди”.
Қозоғистон президенти илгари ҳам Россияни ҳарбий жиҳатдан енгилмас деб таъкидлаган эди. Унингча, бу Россиянинг ҳарбий салоҳияти, аҳолининг президент Владимир Путинни қўллаб-қувватлаши ва тарихий омиллар билан изоҳланади.
Изоҳ (0)