Қозоғистон хорижликлар учун тўлов карталарининг амал қилиш муддатини 12 ойгача чеклади. Қозоғистон молия бозорини тартибга солиш ва ривожлантириш агентлиги қонунчиликка шундай ўзгартириш киритди.
Чора-тадбирлар ноқонуний фаолиятда, шу жумладан гиёҳванд моддалар ва рақамли активлар айланмасида банк хизматларидан фойдаланиш хавфини камайтиришга қаратилган.
Амал қилиш муддати бўйича истисно тадбиркорлик субъектлари, дипломатик ходимлар ва инвесторлар учун чиқарилган тўлов карталарига амал қилади. Битта мижоз томонидан расмийлаштириш мумкин бўлган тўлов карталари сони ҳам бештагача қисқартирилди. Бунда улардан кўпи билан иккитаси кредит бўлиши мумкин. Илгари бу бўйича лимит ўнта карта эди. Болалар учун қўшимча карталар ва банк қарзларини бериш ёки қайтариш учун кредит карталари ҳисобга олинмайди.
Қозоғистон норезидентлари учун карталарни бериш талабларини 2023 йил октябрь ойида кучайтириш режалаштирилган эди. Ўшанда мамлакат Миллий банки норезидентларга картани расмийлаштириш учун вақтинча ёки доимий яшаш учун рухсатнома тақдим этишни талаб қиладиган тузатишларни таклиф қилди. Шунингдек, тўлов ташкилоти устав капиталининг энг кам миқдорини беш бараварга ошириш режалаштирилган эди.
Изоҳ (0)