“Ўзбекистон Республикасининг транспорт-логистика тизимини янада ривожлантириш чора-тадбирлари тўғрисида”ги президент қарори қабул қилинди.
Қарорга кўра, Ўзбекистоннинг транспорт-логистика тизимини 2030 йилгача ривожлантириш концепцияси ва уни амалга ошириш бўйича “йўл харитаси” тасдиқланди.
Қуйидагиларни назарда тутувчи асосий мақсадли кўрсаткичлар ва индикаторлар белгиланди, жумладан:
- автомобиль, темирйўл ва ҳаво транспортида халқаро юк ташиш умумий ҳажмини камида 2 бараварга ошириш;
- транспорт ва логистика хизматлари экспортини 2 бараваргача ошириш;
- контейнерларда юк ташиш улушини камида 1,5 баробарга ошириш;
- Жаҳон банкининг Логистика самарадорлиги индексида (ЛПИ) Ўзбекистоннинг ўрнини 55-поғонадан паст бўлмаган даражагача кўтариш.
Юкларни халқаро ташишни ташкил этишда транспорт-экспедиторлик хизматларига ҚҚС нол ставкада қўлланади.
Ҳужжатда белгиланишича, 2025 йил 1 июндан давлат чегараси орқали автомобиль ўтказиш пунктларида автотранспорт воситаларининг электрон навбат тизими жорий этилади. 27 январдан синов тарзида ишга туширилган Қозоғистон билан чегарадаги “Навоий” божхона постида халқаро йўналишдаги автомобиллар учун электрон навбат тизими жорий этилиши маълум қилинганди.
Халқаро автомобиль транспорти иттифоқи билан ҳамкорликда Халқаро автомобиль транспорти соҳасида кадрлар тайёрлаш ва уларнинг малакасини ошириш бўйича минтақавий ўқув маркази ташкил этилади. Шунингдек, умумий фойдаланишдаги автомобиль йўллари бўйларида йўлбўйи сервис (Service area вa Service point) объектлари ташкил этилади.
Шавкат Мирзиёев 11 январь куни танспорт-логистика тизимини ривожлантириш чора-тадбирлари тақдимоти билан танишганда мутасаддиларга электрон навбат тизимини жорий этиб, чегарадан ўтиш вақтини 20 дақиқагача қисқартириш, транспорт воситаларини онлайн кузатишни йўлга қўйиш орқали қўшимча юк оқимларини жалб қилишни топширганди.
Давлат раҳбари Ўзбекистонда юк жўнатувчи ва ташувчини ўзаро боғлайдиган экспедиторлик хизматларининг асосий қисми хорижий компанияларга тўғри келишини, эндиликда бу соҳада маҳаллий экспедиторларини қўллаб-қувватлаш мақсадида уларнинг халқаро юк ташишдаги хизматларига қўшилган қиймат солиғи олинмаслигини айтганди. Бунинг натижасида маҳаллий корхоналар улушини 45-50 фоизга чиқариш имконияти бўлади.
Изоҳ (0)