Uzbekistan Airways авиакомпаниясининг самолётлари 20 январдан бошлаб Европа мамлакатларига парвоз йўналишида Россия устидан ўтмаяпти. Бу ҳақда “Дарё” манбаси компания бошқаруви раиси Шуҳрат Худойқуловга таяниб хабар берди.
Маълум қилинишича, бу қарор Европа авиация хавфсизлиги агентлигининг Россиянинг Европа ҳудуди устидаги парвозларнинг хавфсиз эмаслиги тўғрисидаги ҳисоботидан сўнг қабул қилинган. Энди Uzbekistan Airways йўналишлари пастдан, аниқроғи, Озарбайжон ва Туркия орқали амалга оширилмоқда.
“Табиийки, бу рейсни бир томонга 30−40 дақиқага узайтиради ва компания учун қўшимча харажатларни келтириб чиқаради. Шунга қарамай, биз тарифларни оширмадик, чунки бу форс-мажор ҳолати ва йўловчи бунинг учун жавобгар бўлмаслиги керак”, дейди Шуҳрат Худойқулов.
Унинг айтишича, авиакомпаниянинг парвозларни бошқариш маркази доимий равишда ҳаво бўшлиғидаги вазиятни таҳлил қилмоқда.
“Айтиш мумкинки, ҳар сонияда таҳлил ўтказилмоқда. Агар вазият хавфли деб баҳоланса — бизнинг рейсларимизда ўртача 200 нафар йўловчи бор ва биз ҳар бири учун жавобгармиз — йўналишни ўзгартириш тўғрисида қарор қабул қилинади, бу ҳақда диспетчерлар дарҳол учувчиларга кўрсатма беради”, деб таъкидлаган Худойқулов.
Қайд этилишича, Қозоғистон ҳудудида Azerbaijan Airlines самолёти ҳалокатидан сўнг Ўзбекистон бош вазири раҳбарлигида комиссия тузилган ва шошилинч муҳокама ўтказилган.
Йўналишлар улар амалга оширилишидан анча олдин ишлаб чиқилади ва келишиб олинади, қарорларни авиакомпаниянинг ўзи эмас, балки мамлакатнинг авиация маъмурлари қабул қилади.
“Биз бунга жиддий эътибор қаратмоқдамиз. Uzbekistan Airways авиакомпаниясининг барча ҳудудларга барча рейслари максимал хавфсизликни таъминлаш шарти билан амалга оширилмоқда”, дея қўшимча қилади Шуҳрат Худойқулов.
Самолётлар билан боғлиқ ҳодисалар
25 декабрь куни Боку—Грозний маршрути бўйича учган самолёт Қозоғистоннинг Оқтов шаҳрида қулаган, оқибатда 38 нафар одам ҳалок бўлганди.
28 декабрь куни Канаданинг Галифакс аэропортида самолёт қўниш чоғида ёниб кетгани хабар қилинган. Йўловчиларнинг сўзларига кўра, самолёт шассисининг ғилдиракларидан бири ишламай қолган. Галифакс аэропорти самолёт бортидаги барча йўловчилар ва экипаж аъзолари эвакуация қилинганини хабар берди.
29 декабрь куни Бирлашган Араб Амирликларида Jazirah Aviation Club авиакомпаниясига тегишли енгил моторли самолёт денгизга қулаб тушди. Маълум қилинишича, авиаҳалокат оқибатида учувчи ва ҳамроҳи ҳалок бўлган.
4 январь куни Airbus А321 йўловчи самолёти Мисрнинг Шарм-аш-Шайх шаҳридаги аэропортга фавқулодда қўнишга мажбур бўлган эди.
Изоҳ (0)