АҚШ давлат котиби Энтони Блинкен ва Арманистон ташқи ишлар вазири Арарат Мирзоян икки мамлакат ўртасидаги стратегик шериклик битимини имзолади. Бу ҳақда Deutsche Welle хабар берди.
Мазкур ҳужжат тўртта асосий соҳада кенг қамровли икки томонлама ҳамкорликка асос солади. Блинкен шериклик иқтисодиёт, хавфсизлик, мудофаа, демократик ислоҳотлар ва икки давлат фуқаролари ўртасидаги алоқаларни кенгайтириш орқали ривожлантирилишини айтмоқда. Илмий-техникавий ҳамкорликка, жумладан, тинч мақсадлардаги ядро соҳасида ҳамкорлик имкониятларини очадиган “123-битим” бўйича ҳам музокаралар бўлиши кутилмоқда.
Арманистон хавфсизлигини мустаҳкамлаш доирасида февраль ойида божхона ва чегара хизмати соҳасидаги америкалик мутахассислар ташриф буюради. Ҳарбий ҳамкорлик қўшма машғулотлари орқали давом эттирилади. Бундан ташқари, Ереван халқаро терроризмга қарши коалицияга қўшилиб, унинг 88-иштирокчисига айланади.
Арарат Мирзоян стратегик шериклик даражасига чиқишни умумий қадриятлар ва манфаатларга асосланган муносабатларнинг табиий ривожланиши, деб баҳолади. У Вашингтоннинг Арманистон суверенитети ва ҳудудий яхлитлигини қўллаб-қувватлашининг аҳамиятини алоҳида таъкидлади. Энтони Блинкен эса Вашингтон ҳамда Ереван ўртасидаги муносабатларнинг янги формати бутун Жанубий Кавказнинг барқарорлигига хизмат қилишига ишонч билдирди.
Москванинг реакцияси
Беларусь, Қозоғистон, Қирғизистон ва Тожикистонни ҳам бирлаштирган Коллектив хавфсизлик шартномаси ташкилоти (КХШТ) доирасида Арманистоннинг асосий ҳамкори бўлган Россия Ереваннинг АҚШнинг стратегик шериги бўлиш қарорига нисбатан анча вазмин муносабатда бўлди.
Россия ташқи ишлар вазири Сергей Лавров 14 январь куни бўлиб ўтган матбуот анжуманида бундай битимнинг имзоланиши Ереваннинг суверен ҳуқуқи экани ва Москва бошқа давлатларга ким билан муносабат ўрнатиш кераклигини айтмаслигини билдирди. Лавров ҳужжатнинг номи ва имзоланиши эмас, балки ҳамкорликнинг амалий оқибатлари муҳим аҳамиятга эгалигини таъкидлади.
Сергей Лавров Москва ва Ереван ўртасидаги муносабатлар қийин даврни бошдан кечираётганини эътироф этиб, мулоқотни давом эттириш муҳимлигини билдирди. Шунингдек, Арарат Мирзояннинг Москвага ташрифини эълон қилди.
Изоҳ (0)