Ҳар биримизнинг ҳаётимиз ўткинчидир. Бир кун келиб қалбимизда абадий муҳрланган, дунёқарашимизни ўзгартирган ва унутилмас хотираларни ҳадя этган инсонлар билан хайрлашишга мажбурмиз.
Қуйида кино, мусиқа ва спорт соҳасига улкан ҳисса қўшган, бироқ ўтган 2024 йилда ҳаётдан кўз юмган машҳур инсонларни ёдга оламиз.
Лиам Пейн
Британиялик хонанда, машҳур “One Direction” поп гуруҳининг собиқ аъзоси, бастакор ва гитарачи Лиам Пейн 17 октябрь куни вафот этди. Хонанда Аргентина пойтахтидаги меҳмонхонанинг учинчи қаватидан йиқилиб тушди ва олинган оғир тан жароҳатлари натижасида воқеа жойида ҳалок бўлди.
Мегги Смит
Гарри Поттер ҳақидаги фильмларда профессор Минерва Макгонагалл роли билан ёдда қолган британиялик актриса Мегги Смит 27 сентябрь куни 89 ёшда оламдан ўтди. Машҳур актриса 90 ёшга тўлишига атиги уч ой қолган эди.
Шеннен Доэрти
2024 йил 15 июль куни “Сеҳрланганлар” сериали юлдузи Шеннен Доэрти 53 ёшида вафот этди. Актриса 2015 йилдан буён кўкрак саратонининг 4-босқичига қарши курашиб келар эди. Охир-оқибат саратон актрисанинг суяклари ва бош миясига тарқалди ва касаллик Доэртини енгди.
Шелли Дювалл
“Порлаш” қўрқинчли фильмининг афсонавий юлдузи Шелли Дювал 12 июль куни ҳаётдан кўз юмди. Унинг ўлимига қандли диабет касаллигининг оғир асоратлари сабаб бўлди.
Роберто Кавалли
Италиялик машҳур моделер Роберто Кавалли 12 апрель куни 84 ёшида вафот этди. У узоқ давом этган касалликдан сўнг Флоренсиядаги уйида вафот этган.
Кавалли чарм ишлаб чиқариш саноати билан билан машҳур эди. Роберто 1970 йилларда ўз компаниясига асос солган бўлиб, Брижит Бардо, Софи Лорен, Ким Кардашьян ва Женнифер Лопес каби юлдузлар учун образлар яратган.
О. Жей Симпсон
Собиқ америка футболи ўйинчиси, актёр ва телебошловчи О. Жей Симпсон Кавалли билан бир кунда вафот этди. У Америка футбол юлдузи бўлган. 1994 йилда рафиқаси Никол Браун Симпсон ва унинг дўсти Рон Голдманнинг қотиллиги учун айбланган.
Жена Роулендс
“Хотира кундалиги” фильмида Элли образини гавдалантирган актриса Жена Роулендс 15 август куни Калифорниядаги уйида ёруғ оламни тарк этди. У умрининг сўнгги йилларида Альцгеймер касаллигидан азият чекиб келган.
Айрис Апфел
Ўзига хос ва ноанъанавий услубга эга бўлган инфлюенсер ва мода иконаси Айрис Апфел 2 март куни 103 ёшида вафот этди. У интерер дизайнери ва коллексионер бўлган ва Трумендан тортиб Клинтонгача бўлган президентларнинг уйи ва офислари интерер дизайнига муаллифлик қилган.
Изоҳ (0)