Фарзанд асраб олишдек эзгу ишни амалга оширган машҳурлар ўзларининг шов-шувли исми ортида инсонийлик ва меҳрга тўла қалблари борлигини исботлайди. Аксарият оилалар асраб олган болаларини ўз фарзандларидек тарбиялайди. Таниқли юлдузлар асраб олган гўдакларнинг ҳаётини яхшилашни мақсад қилади ва улар ҳам бошқа болалар каби ота-она меҳрининг тафтида яшашга ҳақли эканини таъкидлайди.
Сандра Буллок
Жесси Жеймсга турмушга чиққан Сандра доим бола асраб олишни орзу қилган, аммо у ўз ниятига етишига улгурмай, турмушидан ажралди. Сўнг “Оскар” совриндори 2010 йилда ню орлеанлик Луи исмли болани ўз қарамоғига олиб, биринчи марта оналик бахтига муяссар бўлди. Кейинчалик у Лейла исмли қизни асраб олиб, оиласини кенгайтирди. Буллок бир неча бор ЭКУ усули орқали фарзандли бўлишга ҳаракат қилган, аммо уринишлар бесамар бўлган.
Шарлиз Терон
Юлдуз ҳозирда икки фарзанд тарбияси билан банд. 2012 йилда актриса Жексон исмли болани, 2015 йилда эса Жанубий Африкадаги меҳрибонлик уйидан Огаст исмли қизни олиб кетган.
“Мен асраб олинган болани парваришлаш ва ўз биологик фарзандимни тарбиялаш ўртасида ҳеч қандай фарқни кўрмайман”, дейди Терон.
Анжелина Жоли ва Бред Питт
Жуфтликнинг олти нафар фарзанди бор, улардан учтасини асраб олишган. Анжелина 2002 йилда камбожалик Меддоксни, 2005 йилда эфиопиялик Захарани ўз қарамоғига олди. Шундан кейин жуфтлик 2007 йилда ветнамлик Пакс Тен исмли болани асраб олди. Жуфтликнинг Шайло исмли қизи, Нокс Леон ва Вивен Маршелин исмли эгизаклари ҳам бор.
Жоли ва Питт бир неча бор уларнинг оиласи севги, маданиятлар хилма-хиллиги ва ҳар бир авлоднинг илдизларига ҳурматга асосланганини таъкидлаган. Бироқ актёрлар ажримидан сўнг узоқ йиллар давомида оилада кескин муносабатлар ҳукм сурди: собиқ турмуш ўртоқлар йиллар давомида судлашиб келди, Бреднинг қизлари эса отасининг фамилиясидан воз кечди.
Шерон Стоун
2000 йилда Шерон Стоун ва унинг собиқ турмуш ўртоғи Фил Бронштейнлар Роан исмли болани оиласига қабул қилди. Ажримдан тўрт йил ўтгач, актриса яна фарзанд асраб олишга қарор қилди. Сўнг у Лерд ва Куинн исмли болаларни васийлигига олди.
Мадонна
Поп қироличаси Мадонна малавилик тўрт нафар болани асраб олган. У ўғли Девид Банда Мвалени 2006 йилда, уч йилдан кейин эса қизи Чикундо Мерси Жеймсни асраб олган. Мадонна 2017 йилда эгизаклари Стелла ва Эстернинг васийлигини олди. Шунингдек, хонанданинг актёр Карлос Леондан Лоурдес исмли қизи ва режиссёр Гай Ричи билан турмушидан Рокко Жон исмли ўғли бор.
Жейми Ли Кертис
Жейми Ли Кертис ва унинг турмуш ўртоғи Кристофер Гест икки нафар қизларни — Руби ва Энни исмли болаларни тарбия қилиб келмоқда.
Никол Кидман ва Том Круз
Собиқ жуфтлик икки нафар фарзандни: 1993 йилда Изабелла Жейн ва 2005 йилда Коннор Энтонини асраб олган. Том ва Никол 2001 йилда ажрашгандан сўнг, актриса мусиқачи Кейт Урбанга турмушга чиқди. Ушбу никоҳда Сандей ва Фейт исмли икки қиз дунёга келди. Крузнинг эса Кети Ҳолмс билан турмушидан Сури исмли фарзанди бор.
Изоҳ (0)