Қозоғистон Миллий хавфсизлик қўмитаси “ҚирСабйн” (“КирСовун”) номли аноним Telegram канали админларини қўлга олди. Улар машҳур кишилардан салбий маълумотларни эълон қилмаслик эвазига пул талаб қилганликда гумонланмоқда. Бу ҳақда Орда.кз хабар берди.
Админлар устидан таниқли телебошловчи ва инфлюенсер-блогер шикоят қилган. Шундан сўнг ҳуқуқни муҳофаза қилувчи органлар жиноий иш қўзғатган. Канал муаллифлари блогердан шахсий ҳаётига оид маълумотларни ошкор этмаслик учун пул талаб қилган.
У босим ва таҳдидлар остида уч минг доллар тўлаган, аммо таъқиб давом этаверган. Шундан сўнг жабрланувчи ариза ёзишга мажбур бўлган, дейилади хабарда.
Мессенжерлардаги ёзишмалар ва пул ўтказмалари админларнинг айбдорлигини тасдиқлаган. Аноним админларни топиш қийин бўлмаган. Уларнинг шахсий ёзишмалари ортидан товламачиликка учраган бошқа қурбонлар ҳам аниқланган.
Аноним шахслар ўта эҳтиётсизлик билан иш тутган — улар очиқчасига жим туриш эвазига ҳақ талаб қилган ва гўё ўзларининг жазосиз қолишларига ишонган, дейди Орда.кз манбаси.
“ҚирСабйн” аноним канали қарийб 110 минг обуначига эга бўлиб, фақат шахсий ҳаёт ҳақидаги маълумотларга, бошқача айтганда, юлдузлар, инфлюенсерлар ва ҳатто жамоат арбоблари ҳақидаги кўпинча ўйлаб топилган ғийбатларга ихтисослашган. Хусусан, сўнгги учта пост Олмаота жамоатчиси Санжар Боқоевга бағишланган. Энг охиргиси 11 декабрь санасига тўғри келади. Каналнинг шиори: Ҳар бир “тоза”нинг совуни кир, лекин кир нарсалар ҳеч қачон тоза бўлмайди.
“Компромат иши”
Ўзбекистонда 2023 йил 27 январда “Human” ахборот портали директори Хуршид Далиев, собиқ Бандлик ва меҳнат муносабатлари вазирлиги матбуот котиби Мавжуда Мирзаева, “Ўзбекнефтгаз” компанияси матбуот котиби Сиёвуш Ҳошимов қўлга олинди.
ДХХ органлари томонидан фуқаро И.А.дан келиб тушган мурожаатга кўра, фуқаро Д.Х. ва бошқаларнинг Telegram’даги “Компромат.узб” ва бошқа каналлар орқали амалга оширилган жиноятларга алоқадорликлари сабабли уларга нисбатан Жиноят кодексининг 165-моддаси 2-қисми “в” банди (товламачилик) билан жиноят иши қўзғатилган.
Иш бўйича жами тўрт кишига ҳукм ўқилган, хусусан, журналист Хуршид Далиев, Сиёвуш Ҳошимовга 7 йиллик қамоқ жазоси берилган, Мавжуда Мирзаевага озодликни чеклаш жазоси қўлланиб, суд залидан озод қилинган, Аҳмадулло Аҳмаджоновга эса 3 йил муддатга озодликни чеклаш жазоси тайинланган.
Тасдиқланган айблов хулосасига кўра мазкур жиноят иши бўйича 19 нафар жабрланувчи ва 10 нафар фуқаровий даъвогар мавжуд бўлиб, жиноят оқибатида уларга жами 5 миллиард 138 миллион сўм миқдорида моддий зарар етказилгани аниқланган.
Изоҳ (0)