Режиссёр Жеймс Кемерон Empire нашрига берган интервьюсида “Аватар” олами асосида анимацион антология (турли қисмлардан иборат сериал) яратиш режалари ҳақида сўзлаб берди.
Ушбу ғоя Disney студияси раҳбариятига аллақачон тақдим этилган. Кемероннинг айтишича, лойиҳа ҳозирча дастлабки ишлаб чиқариш босқичида ва яқин йилларда амалга оширилиши эҳтимолдан холи эмас.
“Ҳозирча сериал бўйича кўп иш қилганимиз йўқ. Биз асосан сюжет ҳикоялари устида ишлаяпмиз. Аввало, биз тажрибали кинорежиссёрлар ва аниматорларни жалб этишимиз керак, улар ушбу лойиҳага катта қизиқиш билдириши лозим”, дейди Кемерон.
Режиссёрнинг таъкидлашича, сериал формат жиҳатидан “Аниматрица” (2003 йилги “Матрица” олами асосида яратилган антология) лойиҳасидан илҳомланган. Унда одамларнинг Пандорага илк марта ташриф буюриши, фильм қаҳрамонларининг ўтмишдаги саргузаштлари ёки асосий қисмларда тасвирланмаган эпизодлар акс этиши мумкин.
“Мен айнан анимацион антология суратга олишни кўзлаганман”, дейди Кемерон.
Айни пайтда “Аватар” оламининг мухлислари франшизанинг учинчи қисмини кутишмоқда. Бу фильм 2022 йилда чиққан “Аватар: Сув йўли” фильмидаги воқеаларнинг мантиқий давоми бўлади. Унинг премераси 2025 йил 19 декабрга белгиланган. Тўртинчи ва бешинчи қисмлар эса мос равишда 2029- ва 2031 йилларда катта экранларга чиқиши режалаштирилган.
Франшизанинг биринчи ва иккинчи қисмлари кинотарихдаги энг кўп даромад келтирган фильмлар рўйхатида етакчи ўринларни эгаллайди. Биринчи қисм дунё бўйича 2,9 миллиард доллардан ортиқ, иккинчиси эса 2,3 миллиард доллардан кўпроқ даромад олган.
Аввалроқ Жеймс Кемерон “Аватар 6” ва “Аватар 7” учун ҳам муайян ғоялари борлигини очиқлаган, учинчи, тўртинчи ва бешинчи қисмлар учун сценарийлар аллақачон ёзиб бўлингани ҳақида маълум қилган эди.
Изоҳ (0)