Кўплаб машҳурлар фавқулодда ҳолатларнинг гувоҳи бўлиб қолади. Улар ёнғинни ўчиради, биринчи ёрдам кўрсатади, яъни ҳақиқий қаҳрамонликлар қилишади.
Ўтга чидамли Вин Дизель
“Форсаж” кино франшизасининг юлдузи нафақат кинода, балки ҳаётда ҳам ёнаётган машинага киришдан қўрқмайди. 2002 йилда актёр мототциклида Америка кенгликларини кезиб юрганида, тўсатдан ёниб кетган автомобилни кўриб қолади, йўловчилар машинада қамалиб қолганди. Вин тезлик билан ҳаракатланиб, ҳайдовчи ва унинг икки фарзандига машинадан чиқишга ёрдам беради.
Бенедикт Камбербетч — талончилар ҳужуми
Британиялик актёр 2018 йил июнь ойида талончилар тўдасидан курерни қутқариб қолган. Камбербетч Лондон бўйлаб машинада кетаётганида тўрт нафар жиноятчи велосипедда озиқ-овқат етказиб берувчини ўғирлашга уринганини кўради. Бутилкани курернинг бошига уриб синдиришганини кўрган Бенедикт машинадан сакраб тушиб, ёрдамга шошилади. Актёр ортидан такси ҳайдовчиси ҳам эргашади ва муштлашувдан сўнг қароқчилар қочиб кетишади.
Кейт Уинслет муҳаббатини ёнғинда топган
2011 йил август ойида Кейт Уинслет икки фарзанди билан дўсти, миллиардер Ричард Бренсоннинг шахсий оролида меҳмон бўлади. Эрта тонгда яшин туфайли тадбиркорнинг уйида ёнғин содир бўлади. Меҳмонларнинг ёнаётган бинодан чиқиб кетиш учун саноқли дақиқалари бор эди.
Аммо Бренсоннинг 87 ёшли онаси эса тез ҳаракатлана олмасди. Бундай вазиятда Уинслет ўзини ҳақиқий қаҳрамон сифатида тутади: у Евани кўтариб олиб чиқади, уй эса бутунлай ёниб кетади.
Бундай жасоратнинг мукофоти, Ричарднинг чексиз миннатдорлигидан ташқари, муҳаббат бўлади. Айнан ўша саёҳат пайтида Кейт Бренсоннинг жияни Нед Рокнролл (Эдвард Смит номи билан ҳам танилган) билан танишади, унга турмушга чиқиб, учинчи фарзандини дунёга келтиради ва ҳозиргача у билан бахтли ҳаёт кечирмоқда.
Ева Бренсон эса ҳодисадан сўнг яна 10 йил умр кўриб, 2021 йилнинг январь ойида вафот этади.
Шаҳзода Гарри полочини қутқариб қолган
2012 йилда Бразилиянинг Кампинас шаҳрида поло бўйича хайрия ўйини пайтида шаҳзода Гаррининг рақибларидан бири, 41 ёшли америкалик бизнесмен ўйинчилардан бирининг отига урилиб йиқилиб ҳушидан кетади. Шаҳзода Гарри зудлик билан биринчи ёрдамни кўрсатиб, унинг ҳаётини сақлаб қолади.
Леонардо Ди Каприо очиқ денгизда бир одамни қутқарган
2020 йилда Янги йил арафасида Леонардо Ди Каприо Кариб денгизидаги ўз яхтасида дам олаётганида чўкаётган одам ҳақида сигнал олади: Cлуб Мед круиз кемаси экипажининг 24 ёшли аъзоси бортдан қулаб тушганди.
Ди Каприо ўша пайтда 11 соатдан бери сувда бўлган эркакни топишга муваффақ бўлади. Актёр ўзини Виктор деб таништирган эркакни овқатлантириб, иссиқ кийим-кечак билан таъминлаб, қирғоқ соқчилари қўлига топширади.
Дастин Ҳоффман қутқарув хизматини чақиради
Лондонликлардан бири актёр Дастин Ҳоффмандан миннатдор. 27 ёшли Сем Демпстер Гайд-паркда сайр қилиб юрганида юрак хуружига учрайди. Дастин Ҳоффман ҳам ўша ерда сайр қилиб юрган. Эркакнинг йиқилиб ҳушидан кетганини кўрган актёр воқеа жойига қутқарув хизматини чақириб, бригада келгунига қадар жабрланувчи ёнида қолади.
Бред Питтнинг бир нечта қаҳрамонликлари
Тақдир Бред Питтнинг эътибори ва реакциясини тез-тез синаб туради. 2003 йилда у сўнгги дақиқада йўлкага чиқиб кетган автомобиль ғилдираклари остида қолаётган аёлни итариб қутқариб қолган. 2008 йилда эса у Венеция кинофестивалида мухлисни хавфдан қутқаришига тўғри келган.
Актёр мухлисларга имзо бериш пайтида улардан бири сирпаниб, каналларнинг бирига тушиб кетади. Питт мушукдек чаққонлик билан ўзини сувга отиб, чўкаётган кишининг кийимидан ушлаб олади. Йигитни сувдан чиқариб олишгач, Бред унга эсдалик сифатида орзу қилган дастхатини беради.
Яқинда “Беш сония сукунат” фильмининг суратга олиш майдончасида Питтнинг мухлислари тасвирга олиш жойи ҳақида билиб қолишгач, майдонча атрофида тартибсизлик юз беради. Мухлислар металл тўсиққа ёпирилиб, унга яқин турган кичкина қизчани сиқиб қўйишади. Қизча бақириб юборгач, актёр икки нафар шахсий қўриқчиси билан бирга болани оломон орасидан тортиб чиқаради ва ота-онасига топширади.
Изоҳ (0)