Афра Сарачўғлу 27 ёшда: отаси ташлаб кетган, университетни битиролмаган ва онаси туфайли машҳур бўлган севимли актрисангиз ҳақида қизиқарли фактлар

Афра Сарачўғлу — турдизининг истиқболли юлдузларидан бири, ҳозирда унинг номи бутун дунёга машҳур. Бу турк актрисаси бой оилада туғилмаган. Муваффақиятга эришиш учун кўп ишлашига тўғри келган.

Афра Сарачоғлу 1997 йил 2 декабрда Эдремит шаҳрида таваллуд топган. Ота-онаси шоу-бизнес оламидан йироқ инсонлар эди. Қизча 9 ёшга тўлганда улар ажрашиб кетишади. Шундан сўнг Афра онаси билан бирга Анталияга кўчиб ўтади. Лутфие хоним қизини барча зарур нарсалар билан таъминлаш учун кўп меҳнат қилишига тўғри келарди. 14 ёшида Афра Сарачоғлу моделлик соҳасида муваффақиятга эришиши мумкинлигини тушунади — ёрқин ташқи кўриниши ва ажойиб қомати билан подиумларни забт этади.

У онасини менежери қилиб олади. Лутфие хоним қизи номидан ва унинг қонуний вакили сифатида моделлик агентликларидан бири билан фойдали беш йиллик шартнома имзолайди. Жуда банд бўлишига қарамай, Афра ўқишни давом эттиради ва ҳатто Эскишеҳир Османгази университетига ўқишга киради. Сарачўғлу ҳаётининг кейинги босқичи кинематография билан боғлиқ бўлиши лозимлигини тушунади.

Ижодий фаолияти

Афра Сарачўғлу 2015 йилда кинематографияга илк қадамини қўяди. Айнан ўша пайтда унга “Энг гўзали” фильмида кичик рол берилганди. Бироқ фильм катта муваффақиятга эришмайди, бунинг устига актрисанинг роли ҳам аҳамиятсиз эди. Бир йил ўтиб, у “Иккинчи имконият” сериалига кастинг орқали танлаб олинади ва бу унга турк сериаллари оламига йўл очади. Эътиборли жиҳати шундаки, айнан онаси туфайли Афра кастингга таклиф этилади. Лутфие хоним ижтимоий тармоқларда кастинг ҳақидаги эълонни кўриб қолади. У нафақат бош эркак ролини ижро этган, балки ушбу сериалнинг режиссёри ҳам бўлган Ўзжан Дениз билан боғланади. Афранинг онаси унга қизи ва унинг орзулари ҳақида сўзлаб беради, шунингдек, қизининг таржимайи ҳолини юборади. Натижада Сарачўғлу танловдан ўтади ва рол унга насиб қилади.

2017 йилда ёш актриса “Ёмон йигит” тўлиқ метражли фильмида бош ролни ижро этади, бу фильмда унинг партнёри Толға Сариташ бўлади. Мазкур турк драмаси дунёнинг кўплаб мамлакатларида томошабинларнинг эътиборини тортиб, Афра ҳақида турк сериалларининг юксалаётган юлдузи сифатида гапира бошлайдилар.

Шундан сўнг актриса “Фазилат хоним ва қизлари” сериалига таклиф қилинади. Айнан шу лойиҳа туфайли у ҳақида бутун дунё билади. Сарачўғлу ўзининг ўсиб бораётган маҳорати ва серқирралигини яққол намойиш этади.

2019 йилда Афра “Холаваччалар” драмасида, бир йил ўтгач, эса “Ўқитувчи” сериалида рол ўйнайди, кейин эса “Ешилчам”дан таклиф олади. 2022 йилдан бери Сарачўғлу “Қўрғон сирлари” сериалида бош аёл ролини ўйнамоқда. Айнан у сўнгги йиллардаги турдизиларнинг энг ранг-баранг, ёрқин, серқирра ва гўзал қаҳрамони Сейран Шанлини яратди.

Афра Сарачўғлу, шубҳасиз, жуда истеъдодли ва ёрқин турк актрисаси бўлиб, унинг карьераси эндигина муваффақиятли ривожлана бошлаган. Унинг ҳар бир роли олдингисидан тубдан фарқ қилади ва ҳар сафар у қаҳрамонларининг ҳаётини аъло даражада ижро этади.

Шахсий ҳаёти

Машҳур турк актрисаси шахсий ҳаёти ҳақида гапиришни ёқтирмайди. Маълум бўлишича, у 2018 йилдан бери Мерт Язижиўғлу билан муносабатда бўлган. Жуфтлик 2022 йилда ажралишган. Аввалига Афра Мерт Рамазон Демир билан ишқий муносабатда бўлгани ҳақида миш-мишлар тарқалди. Юлдузлар буни ҳар томонлама рад этишган бўлса-да, бир неча ой ўтгач, Язижиўғлу Афра билан ажрашганини тасдиқлади.

2023 йилдан бери турк актрисаси “Қўрғон сирлари”даги ҳамкасби — Мерт Рамазон Демир билан учрашмоқда. Машҳурлар муносабатларини расмий равишда тасдиқламаган бўлса-да, рад ҳам этмаган. Туркиялик мухбирлар уларни бир неча бор бирга суратга олишган, кадр ортидаги видеоларда эса юлдузларнинг бир-бири билан ҳазиллашишини кўриш мумкин. Шунга қарамай, Афра ва Мерт муносабатларни очиқчасига тан олишмайди.

Афра Сарачўғлу ҳозир

Ҳозирда Афра Сарачўғлу “Қўрғон сирлари” сериалида рол ўйнашда давом этмоқда. У, шунингдек, бир нечта брендларнинг расмий вакили бўлиб, моделлик фаолиятини давом эттирмоқда. Актриса бўш вақтини дўстлари ва онаси билан ўтказади. Яқиндагина у онасини Истанбулга кўчириб, вилласи ёнидаги уйни ижарага олганди.

Афра Сарачўғлу ҳақида қизиқарли фактлар

• Афра отаси билан гаплашмайди. Ажрашгандан сўнг актрисанинг отаси АҚШга кетган ва унга ҳеч қандай ёрдам бермаган. 2024 йилнинг ёзида Туркия оммавий ахборот воситаларида Сарачўғлу отаси билан ярашиш учун Америкага кетгани ҳақида хабар тарқалади. Кейинчалик актриса бу миш-мишларни рад этди.
• Актриса олий маълумотга эга эмас. Афра тиғиз иш жадвали туфайли академик таътил олишга мажбур бўлган. Онасининг сўзларига кўра, у “Қўрғон сирлари”нинг учинчи мавсуми финалидан сўнг университетга қайтишни режалаштирмоқда.
• Афра уй ҳайвонларини жуда яхши кўради — унинг суратга олиш майдонига олиб борадиган ити ва мушуги бор.
• Туркиялик актриса ёшлигидан кино ҳақида орзу қилган. Унинг айтишича, болалигида ўзи ҳам сценарий ёзишга ҳаракат қилган ва дўстлари учун театрлаштирилган томошалар уюштирган.
• Лутфие нафақат Афранинг онаси ва менежери, балки унинг энг яқин дўсти ҳам. Актриса бир неча бор муваффақиятга фақат унинг ёрдами ва қўллаб-қувватлаши туфайли эришганини айтган.
• Эдди Редмейн — Сарачўғлунинг кумири. Актриса уни идеал актёр деб ҳисоблайди.
• Актрисанинг сўзларига кўра, у жуда сезгир ва таъсирчан бўлиб, баъзида ўзини назорат қилиши қийин бўлади. Бироқ айнан шундай таъсирчанлик унга қаҳрамонларини аниқ ҳис қилиш имконини беради.