Britaniyalik xonanda, mashhur “One Direction” pop guruhining sobiq a’zosi Liam Peyn Argentina poytaxtidagi mehmonxonaning uchinchi qavatidan yiqildi. Og‘ir tan jarohatlari olgan yulduz voqea joyida halok bo‘ldi. Bu haqda BBC nashri xabar bermoqda.
Mahalliy politsiya xodimlari bergan ma’lumotlarga ko‘ra, 31 yoshli musiqachi Buenos Ayresdagi CasaSur Palermo mehmonxonasining uchinchi qavatidan qulab tushgan. Bir qancha daqiqadan so‘ng voqea joyiga tez yordam xizmati yetib kelgan, biroq bu vaqtda mehmonxona hovlisida topilgan Peyn allaqachon vafot etgan.
“Liam Jeyms Peyn, bastakor va gitarachi, One Direction guruhining sobiq aʼzosi bugun Palermo hududidagi mehmonxonaning uchinchi qavatidan qulab vafot etdi”, deyiladi politsiya bayonotida.
Shuningdek, bundan avval politsiya mahkamasiga giyohvand moddalar va spirtli ichimliklar ta’siri ostida bo‘lgan noma’lum shaxsning bezorilik xatti-harakatlari haqida xabar kelib tushgan.
Shaharning SAME tez tibbiy yordam xizmati rahbari Alberto Kresentining mahalliy televideniyega bergan ma’lumotga ko‘ra, 40 metr balandlikdan yiqilish natijasida xonandaning bosh miya suyagi jiddiy shikastlangan.
Peyn Argentinaga One Direction guruhining yana bir sobiq a’zosi — Nayl Xoranning konsertiga kelgan edi. Bundan bir necha kun avval ertalab Peyn ijtimoiy tarmoqlarda Argentinadagi sayohati haqida post qoldirib, uyga qaytishni intiqlik bilan kutayotgani haqida yozgan edi.
Hozirda musiqachining uch yulduzli CasaSur Palermo mehmonxonasidagi xonasi Argentina huquq-tartibot idoralari xodimlari tomonidan tekshirilmoqda. U yerda ichida noma’lum kukun mavjud bo‘lgan bir nechta folga paketlari topilgan. Voqea joyida mutaxassislar ishlamoqda.
Britaniya Tashqi ishlar vazirligi Argentinada qo‘shiqchining o‘limi haqidagi xabarlar ortidan mahalliy hokimiyat bilan doimiy aloqada ekanini ma’lum qildi.
Liam Peyn 1993-yil 29-avgustda tug‘ilgan. U Britaniyaning The X Factor teleko‘rsatuvida 2008 va 2010-yillarda ikki marta ishtirok etgan. Birinchi marta sudya va musiqa prodyuseri Saymon Kouell unga avvalo maktabni bitirib, keyin tanlovda qatnashishni maslahat bergan. 2010-yilda u The X Factor shousida yana bir bor ishtirok etgan va Cry Me A River qo‘shig‘i bilan barcha hay’at a’zolarini hayratda qoldirgan.
Keyinchalik u boshqa ishtirokchilar — Nayl Horan, Zayn Malik, Garri Stayls va Lui Tomlinson bilan birgalikda “One Direction” guruhini tashkil qildi. Jamoa X Factor shousida g‘alaba qozonmadi, lekin pop musiqa tarixidagi eng muvaffaqiyatli guruhlardan biriga aylandi. Ular butun dunyo bo‘ylab 70 milliondan ortiq disklarni sotgan.
“One Direction” guruhi 2016-yildan o‘z faoliyatini to‘xtatdi va har bir ishtirokchi yakkaxon tarzda ishlay boshladi.
Izoh (0)