Мерилин Монро
Асл исми Норма Жин бўлган актриса 1926 йил 1 июнда Лос Анжелесда дунёга келган. Қизига нисбатан меҳр ва муҳаббатни ҳис қилмаган она, уни тарбиялаш учун ўзига тўқ оилага бериб юборишга қарор қилган. Қизалоқ улғайганида онаси уни қайтариб олади. Бироқ Мерилин ўгай отасининг тегажоғликларига дош бера олмай, холасиникига қочиб кетади. Бироқ қизалоқ холасининг ўғиллари билан тил топиша олмай, у ерда ҳам кўп яшай олмайди. У 16 ёшга тўлганида яшаш учун муқим жойи бўлишини истаб, қўлини сўраган йигитга турмушга чиқади. Бўлажак актриса Иккинчи жаҳон уруши пайтида авиацион заводда, ундан сўнг эса моделлик агентлигида ишлаган.
Стив Жобс
Стив Жобс 1955 йил 24 февралда Сан Францискода дунёга келган. Биологик ота-онаси болакай дунёга келганидан бир ҳафта ўтиб ундан воз кечган. Уни фарзандига борини беришга тайёр америкалик Пол ва Клара исмли жуфтлик асраб олган. Мактаб давридаёқ электроникага қизиққан Жобс, Hewlett-Packard компанияси раҳбарининг эътиборини жалб қилган. Асраб олган ота-онаси уни қўллаб-қувватламаган, қийин кечган болалик бўлажак бизнесменнинг феъл-атворида из қолдирган. Жобс бутунлай муросасиз ва ходимларига нисбатан талабчан бўлган.
Коко Шанель
Моделер ва ХХ асрнинг энг машҳур дизайнерларидан бўлган Габриел Бонел Шанель 1883 йил 19 августда Францияда дунёга келган. Онаси вафот этган, отаси эса фарзандларининг тарбияси ҳақида қайғурмаган. Болалигини етимхонада ўтказган Коко узоқ вақт давомида ҳаётининг бу қисмини эсга олишни ҳам истамаган. Уни асраб оладиган оила бўлмаган. Етимхонани тарк этгач, муваффақиятли моделер бўлиш истагида трикотаж сотиладиган дўконга ишга кирган. Жиддий услубдаги болалар формасига бўлган нафрат уни аёллар гардеробидаги янги либосларни яратишга илҳомлантирган. Интилишлари ва ҳаракатлари билан Коко мода оламида ўз ўрнини топишнинг уддасидан чиққан.
Пирс Броснан
“Жеймс Бонд” юлдузи Пирс Броснан 1953 йил 16 майда Ирландияда дунёга келган. Отаси у туғилгандан кўп ўтмай оиласини тарк этишга, онаси эса фарзандини ўз ота-онасига қолдириб, Лондонда янги ҳаёт бошлашга қарор қилган. Бувиси ва бобосининг вафотидан кейин Пирс тоғаси ва холасининг қўлида қолган. Улар ҳам болага ғамхўрлик қилишни истамай, уни диний муассасага топшириб юборган. Бир неча йил ўтиб онаси ўғли борлигини эслаб, уни Лондондаги янги оиласига олиб келмоқчи бўлган. Аммо шунда ҳам уларнинг ўртасидаги муносабатлар яхшиланмаган.
Жек Николсон
Жек Николсоннинг онаси — Жун Френсис Николсон ўз даврининг машҳур раққосаси эди. У 1937 йил, 18 ёшида она бўлган. Карьерасини давом эттиришни истагани сабаб ҳам ҳомиладорлигини яшириб юрган. Жек дунёга келганидан кейин уни онасининг ўғли сифатида рўйхатга олинишига эришган. Жек ҳақиқатни орадан 36 йил ўтиб, журналистик текширув натижасида билишга муваффақ бўлган. Аммо бу вақтга келиб онаси ҳам, бувиси ҳам ҳаётдан кўз юмган эди.
Изоҳ (0)