Индонезиянинг энг фаол вулқонларидан бири — Левотоби Лаки Лаки кетма-кет иккинчи кун отилмоқда. У 18 километр баландликка тутун ва кул отиб, осмонда улкан булутлар ҳосил қилди. Бу ҳақда CNN хабар берди.
Геология агентлигининг маълум қилишича, вулқон отилиши 1 август куни бошланган. Атрофдаги қишлоқлар вулқон парчалари ва тутун билан қоплаган. Дастлабки маълумотларга кўра, ҳодиса оқибатида ҳалок бўлганлар йўқ.
Вулқон отилишидан бир неча соат олдин, 10 километр баландликда кул булути ҳосил бўлган. Ёнаётган лава ва чақмоқлар эса тунги осмонни ёритиб юборган. Қайд этилишича, газ, тош ва лавадан иборат масса вулқон этагидан 5 километр пастга қараб оқиб тушмоқда. Дронлар ёрдамида олинган кузатувларда магма ҳаракати кучайгани ва бу ҳудудда кучли ер силкинишларига сабаб бўлаётгани қайд этилган.
Кратердан отилаётган иссиқ тошчалардан иборат вулқон материали 8 километргача узоқликка сочилган. Расмийлар ёмғирли об-ҳаво сабаб лаванинг дарёга томон йўналишидан хавотир билдириб, фуқароларни ҳушёр бўлишга чақирмоқда.
Маълумот учун, 1 584 метр баландликдаги Левотоби Лаки Лаки вулқони Флорес оролида жойлашган бўлиб, у 18 июндан бери фаол ҳолатда. Ер силкинишлари сабаб атрофдаги аҳолига 7 километр радиусгача ҳудудга яқинлашиш ман этилган.
2024 йил ноябрь ойида рўй берган бир нечта вулқон отилиб, портлаши оқибатида 9 киши ҳалок бўлганди. Минглаб уйлар вайрон бўлгач, ҳукумат атрофдаги аҳолининг бошқа ҳудудга доимий кўчирилишини таъминлаган.
Таъкидланишича, сўнгги марта мамлакатда энг кучли вулқон отилишларидан бири 2010 йилда содир бўлганди. Ўшанда Ява оролидаги Мерапи вулқони отилиб, 350 дан ортиқ одам ҳалок бўлган ва юз минглаб аҳоли эвакуация қилинган.
Шунингдек, Индонезияда 2025 йил 7 июлда ҳам вулқон фаоллиги кузатилган. Вулқон кулининг кўплиги Бали оролидаги Нгураҳ Рай халқаро аэропортидаги ўнлаб рейсларнинг кечикишига ёки бекор қилинишига сабаб бўлган, йўллар ва шоликорлик майдонлари эса кул ва тошлар билан қопланган.
Изоҳ (0)