2024 йилда ўзбек шоу-бизнесининг кўплаб вакиллари ўз бахтини учратиб, оила аталмиш муқаддас қўрғонга қадам қўйишди. Қуйида ижтимоий тармоқларда дув-дув гап бўлган тўйлар ҳақида сўз боради.
Юсуфхон Нурматов АҚШда уйланди
Марҳум бастакор Мусахон Нурматовнинг ўғли хонанда Юсуфхон Нурматов 17 апрель куни Ирода исмли қиз билан оила қурди. Жуфтликнинг никоҳ тўйи Нью Йорк шаҳрида бўлиб ўтди. Бу ҳақда унинг яқин дўстлари Instagram орқали маълум қилди. Юсуфхон бир неча йилдан бери АҚШда яшаб келмоқда.
Вайнерлар жуфтлиги: Мадина ва Сардор
31 май куни таниқли инстаблогер Мадина Каримова турмушга чиқди. Унинг турмуш ўртоғи ҳам шоу-бизнесга яқин инсон, каскадёр, блогер Сардор Тўраев. У вайнер Бобур Мансуров жамоаси аъзоси ҳамдир. Куёв сурхондарёлик бўлишига қарамай, жуфтликнинг никоҳ тўйи Самарқанд шаҳрида бўлиб ўтди. Тўйда ёшларнинг блогер дўстлари ва кўплаб машҳурлар қатнашди. 2025 йилда Мадина ва Сардор ота-она бўлиш арафасида турибди.
Визажист Акобир тўйини дабдабали ўтказди
Таниқли визажист Акобир Ашуркулович бўйдоқлар сафини тарк этди. Бўлажак турмуш ўртоғи учун уюштирган “Мarry mе” қўл сўраш маросими, фотиҳа тўйи ва никоҳ оқшоми ҳам дабдабали тарзда ўтди. Акобирнинг никоҳдан ўтиш маросимида яқин дўсти ва устози Гоар Аветисян кўринмади ва бу ҳолат Instagram фойдаланувчиларининг муҳокамаларига сабаб бўлди.
Юлдузли хонадоннинг эрка келини Афруза
25 сентябрь куни машҳур хонанда Шаҳло Рустамованинг қизи Афруза турмушга чиқди. У таниқли актёр Ботир Муҳаммаджоновга келин бўлди. Никоҳ оқшомида ўзбек киноси ва мусиқа санъатининг кўплаб таниқли вакиллари иштирок этди. Афрузанинг турмуш ўртоғи Беҳруз Аҳмедов ўзбек миллий академик драма театри актёри. У ссенарист ва мусиқий продюсер сифатида ҳам фаолият юритади. Беҳруз никоҳ тўйидан аввалроқ Афруза билан АҚШ сафари чоғида унинг қўлини вертолётда ноодатий тарзда сўраган эди.
Тўйдан кейин Афруза келин эмас, қиз бўлиб яшаётгани ҳақида гапирди. У қайнона ва қайнотаси меҳрибон инсонлар экани, оилавий сайрга чиқишса, одамлар ўзидан ҳам кўпроқ қайнотаси Ботир Муҳаммаджонов билан суратга тушиши ҳақида гапириб берди.
“30 ёшимгача уйланмайман” — Тимур Алихонов
27 октябрда блогер Тимур Алихонов хоразмлик 20 ёшли блогер Фарида Маримовага уйланди. Блогерлар узоқ вақт давомида турмуш қуришаётгани ҳақида расман ошкор қилмади. Уларнинг тўйи Тошкентда ёшларбоп ва ўзбекча турли урф-одатлардан ҳоли ўтди. Никоҳ кечасида ёшларнинг яқинлари ва блогер дўстлари меҳмон бўлди.
Турмуш ўртоғининг “30 ёшимгача уйланмайман” деганига қарамай, тўрт ой ичида тўй қилиб юборгани ҳақида Фарида ўз саҳифасида айтиб ўтди. Ҳозирда ёшлар Тошкент марказида алоҳида уйда истиқомат қилмоқда.
“Пранк ёки кино эмас”: Рухшона иккинчи марта оқ либос кийди
28 октябрь куни хонанда ва актриса Рухшона иккинчи марта оила қурди. У Улуғбек исмли уйланмаган йигитга турмушга чиқди. Унинг никоҳ кечасида шоу-бизнеснинг кўплаб таниқли вакиллари меҳмон бўлишди.
“Турмуш ўртоғим мендан уч ёш катталар. Ёшим 30 да, турмуш ўртоғимники 33 да. Хуллас, шунақа янгилик. Табрикларни қабул қиламиз ва фамилияни ўзгартирамиз. Мен ҳам бахтли бўлишга ҳаққим бор-ку, тўғрими? Бу пранк ёки кино эмас”, деди Рухшона. Жуфтлик тўйдан бир ой ўтиб асал ойини ўтказиш учун чет элга жўнаб кетди.
Рухшона 2022 йилда турмуш ўртоғи, клипмейкер Санжар Маткаримов билан ажрашганини маълум қилган эди. Унинг икки фарзанди — қизи ва ўғли бор.
Далер Файзуллаев бўйдоқлик билан хайрлашди
Ёшлигидан қўшиқ куйлаб халқ меҳрини қозонган ҳамда ижодда узоқ вақт танаффус қилган хонанда Далер Файзуллаев ҳам бу йил бўйдоқлик билан хайрлашди. Хонанданинг никоҳ тўйи 21 октябрда бўлиб ўтди. Тўйга ўзбек санъатининг энг таниқли вакиллари, хонанданинг дўстлари келиб, унинг бахтли кунида ёнида бўлишди.
Бали оролларида турмушга чиққан Дилноза Ҳабибуллаева
“Миллион” кулги жамоасининг собиқ аъзоси, телебошловчи Дилноза Ҳабибуллаева келинлик остонасига қадам қўйди. Шу йилнинг 1 ноябрида Тошкентдаги ресторанларнинг бирида яқин дўстлари даврасида қиз базмини ўтказди. Катта тўй эса Индонезиянинг Бали оролларида 24 ноябрда бўлиб ўтди. У Америка фуқаросига турмушга чиқди. “Биз кутган кун келди. Ният соф бўлса, якуни ҳам гўзал бўлади” деб ёзади Дилноза ижтимоий тармоқлардаги саҳифасида.
“Йилнинг энг чиройли жуфтлиги”
“Йилнинг энг чиройли жуфтлиги” дея эътироф этилаётган ёшлар — актирса Феруза Юсупова ва блогер Абдували Сахиев ҳаётида ҳам бу йил янги саҳифа очилди. Севгисига етишишни нақд 4 йил кутганини айтган Абдували шу йилнинг 11 ноябрида Ферузага уйланди. Уларнинг никоҳ оқшомида энг машҳур санъаткор ва блогерлар хизматда бўлди. Ферузанинг келин саломини актриса Вазира Юнусова ўтказди. Ёшлар асал ойини Таиландда ўтказди, кейинроқ эса Малдив оролларида давом эттиришади. Шу йилнинг июнида Туркияда соҳил бўйида Абдували Сахиев романтик тарзда Ферузанинг қўлини сўраган эди.
Фарангизбегим Холиқова санъаткорлар оиласига келин бўлди
Марҳум хонанда Ҳусниддин Холиқовнинг қизи, актриса ва инстаблогер Фарангиз Холиқова шу йилнинг 8 ноябрида турмушга чиқди. У турмуш ўртоғи билан Instagram орқали реклама сабабли танишгани ва у йигит кейинчалик гуллар-у турли совғалар билан кўнглига қандай йўл топгани тўғрисида ёзиб қолдирган. Маълум бўлишича, Фарангиз актриса Феруза Юсупова оиласига келин бўлган.
Узоқ кутилган тўй: Ситора Фармонова Дубайда турмушга чиқди
Оқ отдаги шаҳзодасини узоқ кутган 40 ёшли актриса, бошловчи Ситора Фармонова шу йилнинг ноябрида турмушга чиқди. Тошкентдаги яқинлари учун “Яккасарой” тўйхонасида қиз базмини тўйдек қилиб ўтказди. Куёв базмда қатнашмади, Ситорага укаси ҳамроҳлик қилди. Куёвнинг кимлиги ҳақидаги саволларга Ситора тўлиқ жавоб бермади, фақатгина катта никоҳ тўйи Дубайда ёпиқ тарзда бўлиши ва бирорта камера киритилмаслигини айтганди.
“Бўлажак турмуш ўртоғим араб, рус, қозоқ ёки тожик эмас. Келишган ўзбек йигитига совчи орқали турмушга чиқяпман. Севишиб юрмаганмиз, оилавий дўст бўлганмиз. Исми Муҳаммад, ёши меники билан тенг. Бизнес билан шуғулланади, оилавий Дубайда яшашади, Тошкентга келиб туришади” деди Ситора.
Келинчак турмуш ўртоғини бирор марта ҳам оммага кўрсатмади, Instagram саҳифасига ҳам тўйдан фото ва видео жойламади. Тўйдан сўнг Ситора тезда Тошкентга қайтиб, яна ишга шўнғиб кетди.
Наргиз Зокирова тўртинчи марта турмуш қурди
53 ёшли асли келиб чиқиши ўзбекистонлик бўлган хонанда Наргиз Зокирова ўзидан 11 ёш кичик эркак — мусиқий жамоасидаги техник ходим Антон Ловягинга турмушга чиқди. АҚШда яшовчи хонанда шу пайтгача уч марта оила қурган ва уч фарзанди бор. Наргиз Зокированинг марҳум Руслан Шариповдан Сабина исмли қизи, Ернур Канайбековдан Ауэл исмли ўғли, мусиқачи Филипп Балзанодан Лейла исмли қизи бор. Хонанданинг, шунингдек, Ной ва Леви исмли неваралари ҳам бор.
Шу жумладан, “Митти вайн” жамоаси аъзоси Ғулом Насриддинов, “Миллион” кулги жамоаси аъзоси Аслбек Амиров ва инстаблогер Айзимгул Якубова ҳам бу йил турмуш қурди. Оила деб аталмиш қўрғонга қадам қўйган барчани бахт-саодат тарк этмасин!
Изоҳ (0)