Уилл Смит номи Голливуддаги узоқ йиллардан бери машҳур бўлиб келмоқда. У сўнгги 10 йил ичида энг кўп даромад келтирувчи актёрлардан бири. У иштирокидаги фильмлар кассада 9 миллиард доллардан ортиқ фойда келтирган. Смит кино ва продюсерлик фаолияти билан бирга мусиқада — реп йўналишида ҳам ижод қилади.
Уилл Смит тўрт марта “Оскар” мукофотига номзод бўлган. Қизиқарлиси, юқори эътироф этилган фильмларнинг барчаси реал воқеаларга асосланган.
“Али” (2001)
Майкл Меннинг 2001 йилда намойиш этилган “Али” биографик спорт драмасида Уилл Смит биринчи марта тарихда из қолдирган шахсни экранда гавдалантирган. Фильм афсонавий боксчи ва маданият арбоби Муҳаммад Алининг ҳаётига бағишланган. Фильм спортчи ҳаётидаги муҳим йилларига бағишланган бўлиб, унда Муҳаммад Алининг қандай қилиб спортда муваффақият қозониши, машҳурликка эришиши, Исломни қабул қилиши ва Вьетнам урушидаги ҳарбий қўшинларга қаршилик кўрсатиши ҳақида ҳикоя қилади.
Актёр дастлаб бу ролга рози бўлмаган, аммо спортчининг ўзи уни кўндирган. Актёр кўп ойлар давомида рингда машқ қилди, унинг саъй-ҳаракатлари бесамар кетмайди — мазкур роли учун у “Оскар” мукофотига лойиқ кўрилади. Уилл Смит ўз қаҳрамонини чуқур ўрганиш ва бокс санъатини ўзлаштириш учун бир йил вақт сарфлаган.
Фильм рейтинги: КП 7.5, IMDb 6.7
“Бахт ортидан қувиб” (2006)
Фильм энг муваффақиятли брокерлардан бирига айланган ва энг йирик инвестиция компанияси асосчиси бўлган ёлғиз ота — Крис Гарднер ҳақида. Лойиҳа 2006 йилда Крис Гарднер ва Квинси Троупнинг “Бахт ортидан қувиб” номли бесцеллер китобига асосланган.
Қаҳрамони фаолиятининг бошида пул билан боғлиқ муаммоларга дуч келади. Крис маош тўланмайдиган олти ойлик стажировкадан ўтади, у ерда 19 та рақобатчини мағлуб этиши керак бўлади. Бош қаҳрамоннинг ўғли образини актёрнинг фарзанди Жейден ўйнаган. Лойиҳа Смитга иккинчи “Оскар” номинациясини олиб келди, ўғли эса МTV мукофотига сазовор бўлди ва “Йил ютуғи” деб топилди. Танқидчиларнинг ижобий баҳоларидан ташқари, фильм тижорий муваффақиятга эришди ва 55 миллион долларлик бюджетга нисбатан 307,1 миллион доллар даромад келтирди.
Фильм рейтинги: КП 8.3, IMDb 8.0
“Ҳимоячи” (2015)
Питер Ландесманнинг “Ҳимоячи” фильмида актёр асли келиб чиқиши Нигериядан бўлган америкалик шифокор, патологик анатомия ва суд тиббиёти эксперти, доктор Беннетт Омалу ролини ижро этган. Доктор футбол ўйинчиларида бош миянинг дегенератив касаллиги — сурункали травматик энсефалопатияни аниқлайди.
Фильм реал воқеаларга асосланган бўлиб, NFL футбол ўйинчиларининг бош жароҳати натижасида юзага келадиган жиддий мия шикастланиши ҳақида хабардорликни оширишга қаратилган саъй-ҳаракатлар ҳақида ҳикоя қилади. Доктор Омалунинг тадқиқотлари NFL билан зиддиятни келтириб чиқарди, улар шифокорнинг тадқиқотлари тарқалмаслигини истайди. Фильмда шифокорнинг ўз касбига садоқати ажойиб тарзда тасвирланган.
Фильм рейтинги: КП 6.8, IMDb 7.1
“Қирол Ричард” (2021)
Уилл Смит мазкур биографик фильмда теннисчилар Венера ва Серенанинг отаси Ричард Уильямс ролини ўйнайди. Болалигидан у фарзандларини буюк спортчилар бўлишларига ишонтириб ўстирган. Вақт ўтгач, қизларининг каттаси таниқли мураббий Пол Коэн эътиборига тушади. Кичик қизи ортда қолмаслиги учун Ричард барча машғулотларни ёзиб олади ва у билан ўзи шуғулланади. Мазкур рол туфайли актёр истеъдодининг янги қирраларини очиб беради ва буни танқидчилар ҳам, томошабинлар ҳам таъкидлашади. Ушбу роли учун актёр 2022 йилда яна бир бор “Оскар”га муносиб кўрилади.
Фильм рейтинги: КП 7.6, IMDb 7.5
“Озодлик” (2022)
“Озодлик” фильмида Уилл Смит мураккаб драматик рол ўйнади, бу кўплаб томошабинларни унга бошқа томондан қарашга мажбур қилди. У ўтган асрнинг шафқатсиз даврида жуда азият чеккан, ва ниҳоят 1860 йилларда қочиб кетган қул образини яратди. Питер исмли қаҳрамон қуллар овчиси Фассел (Бен Фостер) дан қочиш учун ботқоқлар ва хавфли жойлардан ўтиши керак бўлади. Нажот топиш ва оиласи билан бирлашиш илинжида у барча тўсиқларни енгади.
Фильм рейтинги: КП 6.6, IMDb 6.3
Изоҳ (0)