Ижтимоий тармоқ фойдаланувчилари Tesla компанияси тақдим этган янги маҳсулотлар ва 2004 йилда “Мен роботман” фильмида намойиш этилган футуристик технология ўртасидаги ўхшашликларни қайд этди, деб ёзади “Правила жизни” нашри. Тез орада мазкур фильм режиссёри Алекс Прояс бунга ўз эътирозини билдирди ва Илон Маскни плагиатда айблади.
Фото: Правила жизни
Tesla компанияси бош директори Илон Маск одамсимон роботларнинг янги прототиплари, сунъий интеллект ёрдамида бошқариладиган рулсиз роботакси (Cybercаb) ва 20 кишилик сиғимга эга Робован номли фургон ҳамда робот Optimus’нинг янгиланган версиясини тақдим этди. “Wе robot” тақдимоти Бербанк шаҳридаги улкан киностудияда бўлиб ўтди ва тадбирни ижтимоий тармоқларда бир неча миллион киши томоша қилди.
Режиссёр Прояснинг сўзларига кўра, Илон Маск унга тегишли “Мен роботман” фильмидаги роботлар ва ҳайдовчисиз транспорт воситаларининг дизайн ғояларини ўғирлаган.
“Ҳой, Илон Маск, менга тегишли дизайнларни қайтариб берасанми?”, деб ёзди у Х ижтимоий тармоғида.
У постга фильмдан олинган кадрлар билан Tesla компаниясининг янги маҳсулотларидан суратларни қиёсий коллажни сифатида илова қилди:
“Мен роботман” фильмидаги воқеалар 2035 йилда Чикагода бўлиб ўтади. Ҳикояда одамсимон роботлар жамиятнинг тўлақонли аъзоси сифатида тасвирланади: улар давлат хизматида ўрин эгаллайди, ижтимоий соҳаларда фаолият олоб боради ва шу билан бирга робототехниканинг учта асосий қонунига мувофиқ ҳаракат қилади. Унда актёр Уилл Смит бош ролни ижро этган. Фильм 2005 йилда “Оскар” мукофотининг энг яхши визуал эффектлар номинациясида номзод бўлган.
Миллиардер Маскнинг плагиатда айбланиши биринчи ҳолат эмас. 2019 йилда Tesla компаниясининг Cybertruck электромобили Пол Верховеннинг “Хотирала оғушида” (“Total recаll”) фильмидаги автомобилга қиёсланган эди.
Изоҳ (0)