Ташқаридан қараганда, кўплаб машҳурлар доимо табассум қилиб юрадигандек кўринади, улар ўзлари ҳақида эмас, балки атроф-муҳит мувозанати ва дунё тинчлиги ҳақида қайғуради. Бироқ айримлари, қанчалик уринмасин, барибир шоу-бизнесда ва ундан ташқарида ўзларининг инжиқликларини намоён қилади.
Гвинет Пэлтроу ҳамкасблари ва жамоатчилик нафратланадиган машҳурлар орасида етакчилик қилади. 2013 йилда Star журнали актрисани “Голливуддаги энг нафратга лойиқ юлдуз” деб топади. Ҳаммаси 1999 йилда ёш Гвинет “Ошиқ Шекспир” фильмида “Энг яхши аёл роли” учун “Оскар”ни қўлга киритгандан сўнг бошланди. Бундай ғалабадан сўнг П'лтроунинг ўз назарида обрўси ошиб кетди.
“Аслида қандай бўлсам, ўшандайман. Ўзимни йилига 25 минг доллар ишлаб топадигандай қилиб кўрсатолмайман ахир”, — деганди Гвинет бир пайтлар камтарлик билан. Актриса у ва бошқа мултимиллионерларнинггина қурби етадиган соғлом, аммо қиммат турмуш тарзини фаол равишда тарғиб қилгани учун тез-тез танқид қилинади.
Айни пайтда актриса тадбиркор ва турмуш тарзини қандай олиб бориш бўйича мутахассис бўлса-да, далилларга асосланмаган кўплаб баёнотлари билан ҳам машҳур. Мисол учун, 2014 йилда Пэлтроу бошқа касб эгаларига қараганда, актрисалик касби қийинроқ эканини айтади. Унинг айтишича, суратга олиш жараёнида чидаб бўлмас қийинчиликларга дуч келган актрисаларга қараганда оддий аёлларга ишлаш ва шу билан бирга болаларга ғамхўрлик қилиш осонроқ.
“Менимча, Стив Жобс деганда ҳамманинг кўз олдига интернет келса, Канье Уэст деганда мода ва маданият тушунилади”, деган эди бир марта рэпер ўзи ҳақида ҳаддан ташқари манманлик билан. Яна бир интервьюсида Канье ўзини “Худонинг элчиси” деб атайди. Дарвоқе, мусиқачининг ҳаётидаги энг катта армони — у ҳеч қачон ўз концертини жонли кўра олмаслигидир.
2009 йилда рэпер саҳнага сакраб чиқади ва МTV Видео Music Awards мукофотининг “Энг яхши аёл видеоси” номинациясида ғолиб бўлган Тейлор Свифтни нутқ сўзлашдан тўхтатади. Канье Тейлорга ва бутун дунёга бу мукофотга фақатгина Бейонсе муносиб эканини айтади.
Бу ҳали ҳаммаси эмас. “Телебошловчи: яна салом” фильми устида ишлаган барча ҳамкасбларининг айтишича, бир неча кун ичида рэпер ҳамманинг жонига теккан. Уилл Ферреллнинг сўзларига кўра, Уэст мусиқани шу қадар баланд овозда тинглаганки, бу суратга олиш жараёнига халақит берган. Канье иштирокидаги кадрлар суратга олинган бўлса ҳам у ўзининг трекларини баланд овозда эшитишда давом этиб, суратга олиш майдонини тарк этишдан бош тортган. Рэпер машҳур телебошловчи Конан О’Браен билан эфирга чиқишни қатъиян рад этишини эса зудлик билан душ қабул қилиши кераклиги билан изоҳлаган.
Кэтрин Зета-Жонс вақти-вақти билан ўзининг мавқейи ва баъзи одамлар каби танга ёки чинни ҳайкалчаларни эмас, балки ҳашаматли уйларни йиғиши билан мақтаниб туради. Баъзида Кэтрин ҳар доим бир хил оёқ кийимнинг икки ёки беш нусхада сотиб олиши кераклигидан шикоят қилади. Ахир ҳар бир уйида унга керак бўлган пойабзал бўлмаслиги мумкин. 2003 йилда актриса ҳатто “бир миллион доллар аслида унга ўхшаганлар учун катта сумма эмаслигини” айтади.
Бир марта Зета-Жонс жим туришдан чарчаганини ва жамоатчилик унга ҳашаматли ҳаёти учун танбеҳ беришига йўл қўймаслигини айтади. “Бой бўлганим, кино юлдузига турмушга чиққаним, ҳозир ҳам ажойиб кўринишда эканлигим учун ҳаммадан узр сўрайман”, — деганди Кэтрин The Mirror нашрига берган интервьюсида.
“Худбин” Уилл Смитнинг такаббурлиги ҳақида унинг ҳамкасблари интервьюларида ҳеч иккиланмай гапиришади. Уилл билан “Бел-Эирнинг янги шаҳзодаси” сериалида суратга тушган актриса Жанет Хуберт Смит ўзини болалардек тутишини тўхтатиб, барча қилмишлари учун кечирим сўрагандагина лойиҳани давом эттиришга рози бўлишини айтади.
“Аммо у кечирасиз, деган сўзни билмайди”, — дейди Жанет ва ҳеч қачон у билан бир фильмда ўйнамаслигини таъкидлайди.
Смитнинг ўзи ҳам Ер Қуёш атрофида эмас, балки унинг атрофида айланишини яширмайди. “Отанг — дунёдаги энг буюк актёр, шунинг учун менинг соямда қолиб кетишинг мумкин. Машҳурлигимнинг бир томчисига эришиш учун ҳам ҳали қанча қийналасан”, деган Уилл бир куни ўғли Жейденга.
Женнифер Лопес энди Бронксдан келган оддий қиз эмас. Актриса официантлар ва стюардессалар билан гаплашишдан қатъиян бош тортади ва ёрдамчиларидан илтимосларини уларга етказишни талаб қилади. Агар стюардесса тўғридан-тўғри Лопесга гапирса ҳам, у ёрдамчиларидан бирининг жавобини кутишига тўғри келади.
Жей Ло сотувчи билан ҳам мулоқот қилишни ёқтирмайди. Бир куни хонанда бутикка киради ва савдо ходимининг унга қандай ёрдам бериши мумкинлиги ҳақидаги саволига жавобан бир жуфт сузиш кийимини олиб, қизнинг юзига отади ва кийиниш хонасига кириб кетади. Сотувчининг сўзларига кўра, у шу қадар ҳайратга тушадики, шу заҳотиёқ Лопеснинг орқасидан бориши кераклигини англолмайди. Бундан ғазабланган юлдуз ҳеч нарса харид қилмай дўконни тарк этади.
Бейонсе ҳам ўзини коинот маркази деб билади. “Менда илоҳий истеъдод бор, бу мени ҳар доим бошқа одамлардан ажратиб туради”, дейди қўшиқчи. Аммо хонанда Destiny’s Child гуруҳидаги собиқ ҳамкасбларининг вокал қобилиятлари ҳақида паст фикрда. 2000 йилга келиб у “ниҳоят уларнинг ҳаммаси қўшиқ айтиши мумкин” дейди. Айтганча, 2013 йилда Super Bowl спорт мусобақаси финалидаги мусиқий танаффус пайтида Бейонсе яна Келли Роуленд ва Мишель Уильямс билан саҳнада учрашади. Қизлар гуруҳининг собиқ аъзолари иккита машҳур қўшиқларини ижро этади. Тўғри, Бейонсе яккахон қўшиқ айтаётганда, қизлар захира раққоса сифатида ҳаракат қилишлари керак эди.
Ҳеч кимга сир эмаски, юлдуз у билан ишлайдиган ёки унга ёрдам берганларга нисбатан ҳам такаббур ва қаттиққўл. Шундай қилиб, 2013 йилда Мисрнинг собиқ қадимий асарлар вазири Заҳи Ҳавас Бейонсега Гиза пирамидалари бўйлаб саёҳат уюштиришдан бош тортган, чунки қўшиқчи манзилга бир неча соат кечикиб келган бўлса-да, кечирим сўрашни хаёлига ҳам келтирмаган.
Бутун дунёга машҳур Жастин Бибер ёшлигиданоқ такаббур йигит бўлган. У анчадан бери хатти-ҳаракатларини назорат қилиш одатини йўқотган. Қўшиқчи меҳмонхона балконидан мухлисларига тупуриши, Нью-Йорк ресторанининг ошхонасида “чоптириши”, Буэнос-Айресдаги клуб саҳнасини Аргентина байроғи билан артиши, зиёфат шовқинидан шикоят қилган қўшниларга тухум улоқтириши мумкин — бу рўйхатни узоқ давом эттирса бўлади. 2017 йилда Хитой ҳукумати Бибернинг хатти-ҳаракати туфайли мамлакатдаги концертини тақиқлаганди.
Изоҳ (0)