Райан Гослинг тўқишни яхши кўради, Жонни Деппда қўғирчоқлар коллекцияси бор: севимли машғулотлари билан сизни ҳайратга солувчи машҳурлар

Хобби – инсоннинг кундалик ҳаётига ўзига хослик ва ёрқинлик бағишлайдиган, унга қувонч ҳиссини берадиган машғулот. Голливуд юлдузларидан айримларининг севимли машғулотлари ноодатийлиги билан сизни ҳайрон қолдирмасдан қўймайди.

Николь Кидман

“Катта кичик ёлғон” фильми юлдузи экран орқали ўз мухлисларига нозик ва жозибали аёллар қиёфасида кўриниш беради. Ҳаётда эса парашютдан сакрашни жуда яхши кўради. Австралиялик актрисанинг парашютдан сакраш машғулотлари учун махсус рухсатномаси ҳам бор. Бундан ташқари, Кидман бошқа аёлларни ҳам ҳеч нарсадан қўрқмасликка, ҳаётда янгиликка интилиб яшашга чақиради.

Бред Питт

Америкалик актёр нималарга қодир эканлигини мухлисларига аллақачон исботлаб бўлган. Шунинг учун дуч келган фильмда суратга тушишга рози бўлавермайди. Эътиборга сазовор фильмларни бирма-бир кўздан кечиради. Бўш вақтида эса кулолчилик билан шуғулланишни хуш кўради. Сополдан ажойиб буюмлар ясаш – унинг энг севимли машғулотларидан бири. Бироқ Голливуд юлдузига қараб унинг бундай антиқа хоббиси бор эканлиги хаёлингизнинг бир четига ҳам келмайди.

Уилл Смит

Уилл Смит фикрларини тартибга келтириш, диққатини бир ерга жамлашга ёрдам берадиган севимли машғулотини аллақачон топиб бўлган. У яқин дўстлари – Том Круз ва Дэвид Бекхэмларни ҳам қиличбозлик спорт тури билан шуғулланишга кўндирган. Бу эса кутилмаган натижаларга олиб келди. Юлдузли учлик қиличбозлик машғулотларига доимий равишда қатнай бошладилар. Бундан ташқари, Том Крузнинг уйида дўстлари учун алоҳида ажратилган хона ҳам бор, юлдузли учлик айнан шу ерда тўпланиб, бирга вақт ўтказиш ва суҳбатлашишни хуш кўради.

Анжелина Жоли

Мафтункор актрисанинг севимли машғулоти сизни ҳайратга солиши шубҳасиз – у ханжарлар коллекция қилишга қизиқади. Актриса ўсмирлик вақтларидаёқ онаси билан бирга махсус дўконга боришни хуш кўрар ва бу ердан ўзига ёққан ханжарларни сотиб оларди. Таъкидлаш керакки, ушбу қизиқиш Анжелинанинг ўғли Меддоксга ҳам “юққан”. Жолининг айтишича, она-бола самурайлар, қандай усуллар билан душманлари устидан ғалаба қозонгани ҳақида суҳбатлашишни яхши кўришади.

Розарио Доусон

Юлдузлардан бири совуқ қуролларни коллекция қилиш, бошқа бири қиличбозлик билан шуғулланишга қизиқса, Розарио Доусон “Юлдузли йўл” франшизасининг ашаддий мухлисига айланган. Таниқли юлдуз “Cоmic-Cоn”га доимий равишда ташриф буюради. Қизиғи шундаки, актриса клингон тилини ҳам ўрганиб олган.

Райан Гослинг

“Ларс ва ҳақиқий қиз” фильмини суратга олиш жараёнида актёр ўзи учун янги хобби – тўқишни “кашф этган”. Райанга тўқиш шунчалик ёқиб қолганки, ҳалигача бўш вақти қолди дегунча уни бирор буюм тўқиб ўтирган ҳолда кўрасиз. Дунёдаги энг ёқимтой эркаклардан бири дея тан олинган актёр ўз интервьюларида тўқиш билан кечгача шуғулланган кунини мукаммал кун деб билиши ҳақида айтиб ўтган. Гослинг севимли машғулоти билан банд бўлган вақтда уни биров безовта қилиб қўймаса, актёр ажойиб шарфни тўқиб битиради.

Том Хэнкс

Афсонавий актёрнинг ўзига хос қизиқиши бор – у эски ёзув машинкаларини коллекция қилиш билан шуғулланади. Буни ҳақиқатдан қизиқарли ва ноодатий хобби дейиш мумкин. Актёр 19 ёшида ўзига ёқиб қолган эски ёзув машинкасини харид қилган ва ўша вақтлардан бери уларни коллекция қилиш билан шуғулланиб келади. Шу билан бирга актёр келажакда машинкаларининг барчасини тарқатиб юбориши ва ўзи билан фақатгина битта нусхани олиб қолишини айтиб ўтган.

Сьюзан Сарандон

Голливуд актрисаси ўзининг саъй-ҳаракатлари билан хобби инсонга яхшигина даромад олиб келиши мумкинлигини исботлаб берган. Сьюзан кўп йиллардан буён пинг-понг ўйнаш билан шуғулланади. Пинг-понг спортига бўлган қизиқиш уни шу услубда жиҳозланган бар очишга ундаган. Сарандон бундай қарор унга даромад келтириши мумкинлигини ўйлаб ҳам кўрмаган. Бугун эса унга тегишли барда пинг-понг бўйича турнирлар, лигалар ва қизғин мусобақалар ўтказиб келинади.

Жонни Депп

Сиз севган Жонни Депп Барби қўғирчоқларини яхши кўришига ишона оласизми? Бунинг ҳақиқатдан ноодатий қизиқиш эканлигини актёрнинг яқинлари ҳам тан олган. Ижодкорнинг айтишича, у қўғирчоқлар билан ўйнашга уста. Актёрда бундай ноодатий қизиқиш пайдо бўлишига унинг қизи сабабчи. Қўғирчоқлар ота-бола ўртасидаги муносабатларни мустаҳкамлашга ҳам ёрдам берган.

Николас Кейдж

Тим Бёртон ўз вақтида “Supermen” ҳақидаги фильмда суратга тушишни хоҳлаган. Сценарий ҳам, либослар ҳам, бош роль ижрочиси ҳам тайёр бўлган. Интернетдан ҳаттоки ижодкорнинг суперқаҳрамон либосини кийиб тушган расмларини ҳам топиш мумкин. Бироқ студия тез орада лойиҳани бекор қилган. Режиссёр кўп ўтмай фильм ҳақида унутиб юборган, Николас эса йўқ. Унинг ушбу қаҳрамонга бўлган қизиқиши шунчалик кучайиб кетганки, ижодкор бугунги кунга қадар Кларк Кентга бағишланган буюмларни коллекция қилиш билан шуғулланиб келади.