ListChallenges портали дунёдаги энг гўзал актрисалар рўйхатини тузди. Йигирматаликка нафақат ўз иқтидори, балки жозибали ташқи кўриниши билан бутун дунёдаги мухлислар ҳурмат ва эътиборини забт этган юлдузлар киритилди.
Энг гўзал актрисалар рейтингида 20-ўринни Сальма Ҳайек эгаллади. 57 ёшли актриса Мексикада туғилган ва карьерасини ўз ватанида бошлаган. У “Тереза” ва “Қурбон бўлган муҳаббат” теленовеллаларида роль ўйнаганидан кейин машҳурлик чўққисига чиқди.
Иккинчи фильм унга BAFTA’нинг ўзига хос мексикача эквиваленти — Ариэл мукофотини олиб келди. Аммо юлдуз бундан ҳам кўпроғини хоҳларди, таваккал қилишга тайёр эди. Шу тариқа у 1991 йилда Голливудга йўл олди.
Бир нечта эпизодик роллардан сўнг, актриса ўзининг биринчи асосий ролини олади: Антонио Бандерас билан бирга “Умидсиз” фильмида роль ўйнайди. Шундан кейин Жорж Клуни, Уилл Смит ва Пенелопа Круз каби бошқа юлдузлар иштирокидаги лойиҳаларда иштирок этди. Ҳайек “Фрида” фильмидаги бош роли учун “Оскар” мукофотига номзод бўлган.
Рўйхатнинг кейинги ўринларига 2011 йилда 79 ёшида вафот этган актриса Элизабет Тейлор киритилди. У Голливуднинг энг гўзал актрисаларидан бири ҳисобланган ва икки карра “Оскар”ни қўлга киритган. Элизабет ўн ёшида фильмларда роль ўйнай бошлаган.
1956 йилда у Жеймс Дин билан биргаликда “Гигант” фильмида роль ижро этди. Тейлорга “Клеопатра” фильми энг катта муваффақиятни олиб келди. Актриса 79 ёшида юрак етишмовчилигидан вафот этган.
Грэйс Келли ҳам кучли йигирматаликка киритилди. У 1929 йилда бадавлат оилада туғилган ва болалигидан актёрлик фаолиятини бошлаган. 1955 йилда Келли “Қишлоқлик қиз” драмасидаги роли учун “Оскар”га сазовор бўлди.
1956 йилда эса у Монако князи Ренье III билан турмуш қургач, Грэйс Келли кинодаги фаолиятига якун ясади. У 1982 йил 13 сентябрда автоҳалокатда вафот этди.
Француз кино юлдузи Брижит Бардо ҳам энг латофатли актрисалар рўйхатидан ўрин олди.
У 1956 йилда суратга олинган “Ва Худо аёлни яратди” фильмида суратга тушганидан сўнг жаҳон миқёсида шуҳрат қозонган. Актриса ҳозир 89 ёшда бўлиб, 1973 йилда актёрлик фаолиятини якунлаганини эълон қилганди.
Рейтингда кейинги ўринни “Зорро ниқоби” ва “Тузоқ” каби фильмлар орқали машҳур бўлган актриса Кетрин Зета-Жонс эгаллади. У “Чикаго” мюзиклидаги роли учун “Оскар”га, шунингдек, “Тунги мусиқа” фильмидаги ижроси учун “Тони” мукофотига сазовор бўлган.
2004 йилда Зета-Жонс Том Ҳэнкс билан биргаликда Стивен Спилбергнинг “Терминал” фильмида роль ўйнаган, шунингдек, Жорж Клуни ва Брэд Питт билан “Оушеннинг ўн икки дугонаси” криминал комедиясида суратга тушган.
25 ёш фарққа қарамай Кетрин Зет-Жонс 1998 йилда актёр Майкл Дуглас билан турмуш қурди. Ҳозирда жуфтликнинг икки нафар фарзанди бор.
Гўзал актрисалар рейтингида “Жеймс Бонднинг қаллиғи” ҳам ўрин олди. Швейцариялик киноактриса Урсула Андресс Жеймс Бонд ҳақидаги биринчи фильм бўлган “Доктор Но” фильмида Агент 007 нинг севгилиси ролини ижро этди. Бу роль Урсула карьерасининг чўққиси бўлиб қолди, чунки кейинги йиллар давомида у фильмларда камроқ чиқа бошлади. Ҳозирда модел ва актриса 88 ёшда, у оиласи билан Европада яшайди.
Энг гўзал ва мафтункор актрисалар бешталигида 2023 йилда 82 ёшида вафот этган Ракел Уэлч ҳам бор. Турмуш ўртоғи билан ажрашгач, у икки фарзанди билан ёлғиз қолди ва мода кўргазмаларида модел сифатида қатнашиб, тирикчилик қила бошлади.
Сўнг у ўзини Голливудда синашга қарор қилди ва “Фантастик саёҳат” ҳамда “Милоддан аввалги бир миллион йил” фильмларида иштирок этди. Мазкур лойиҳалар актрисага катта муваффақият ва молиявий барқарорлик олиб келди. 1975 йилда Ракел “Уч мушкетёр” фильмидаги роли учун “Олтин глобус” мукофотини қўлга киритди.
Рейтингдаги кучли учталикни актриса Анжелина Жоли очиб берди. “Оскар” мукофоти совриндори, шунингдек, уч карра “Олтин глобус” мукофоти ва икки марта кино гилдияси мукофоти совриндори бўлган Анжелина Жоли БМТнинг эзгу ният элчиси ҳамдир.
Унинг жаҳон миқёсидаги муваффақиятига “Жаноб Смит ва Смит хоним” фильми сабаб бўлди. Лойиҳада у Брэд Питт билан танишди ва бир неча йиллардан сўнг жуфтлик оила қурди. Ҳозирда улар расман ажрашган.
Иккинчи ўринни 1947 йилда намойиш этилган “Жазда фақат қизлар” мусиқий фильмида роль ўйнаган Мэрилин Монро эгаллади. 1950 йилда Мэрилин “Асфалтли чангалзор” фильмида кичик роль ўйнайди.
Кейин у “Тундаги тўқнашув”, “Қандай қилиб миллионерга турмушга чиқиш керак” каби фильмларда иштирок этади. Аммо ҳақиқий машҳурлик унга “Жентльменларга малласочлар ёқади” лентаси чиққандан кейингина насиб этди.
ListChallenges портали рейтингининг натижаларига кўра, барча даврларнинг энг гўзал ва иқтидорлик актрисаси Моника Беллуччидир. 59 ёшли юлдуз Италияда таваллуд топган ва болалигидан ҳуқуқшунос бўлишни орзу қилган, аммо соҳибжамоллиги эътибордан четда қолмаган Белуччи 16 ёшиданоқ моделлик оламига қадам қўйди. Охир-оқибат у судларда қатнашишдан кўра, халқаро подиумларда чиқишни афзал билди.
1996 йилда Моника Беллуччи кино оламида ўзининг илк муваффақиятига эришди: “Квартира” фильмидаги роли учун Моника Сезар мукофотига сазовор бўлди. Актриса икки карра “Олтин глобус” ҳамда “Кумуш тасма” мукофотини қўлга киритган. Беллуччининг яна бир омадли роли Жузеппе Торнаторенинг “Малена” драмасидаги ижроси бўлган.
Изоҳ (0)