Америкалик актёр ва ҳип-ҳоп қўшиқчи Уилл Смит ўз фаолиятидаги энг яхши фильмларни эслар экан, 20 йил аввал экранларга чиққан “Бахт ортидан қувиб” драмаси унга кўпроқ ёққанини айтиб ўтди.
Кино танқидчилари томонидан ижобий баҳоланган, 2006 йилда суратга олинган мазкур фильм Сан-Францискодаги бошпанасиз ва ёлғиз отанинг ҳаёти ҳақида ҳикоя қилади. Фильм реал воқеаларга асосланган бўлиб, бош қаҳрамон йирик компанияга ишга киришга ва секин-аста карьерасини йўлга қўйишга муваффақ бўлади. Шу билан бирга, фильмда Уилл фарзандига гўзал тарбия бериши ҳам ёритилган.
Актёр бу ҳақда шундай дейди:
“Фикримча, мен суратга тушган энг яхши фильм бу — “Бахт ортидан қувиб” драмаси. Кейинги ўринда “Қора либосли одамлар” фильми туради. Лойиҳада режиссёр, операторлар ва мусиқа — барчаси аъло даражада ишлашди”.
Уилл Смит “Ёмон йигитлар”, “Оловуддин” фильмларини турли саргузаштларга бой ва томошабинни зериктирмайдиган лойиҳалар деб ҳисоблайди. Шунингдек, актёр “Мен афсонаман” ва “Энг яхши актёр” номинациясида “Оскар”га сазовор бўлган “Қирол Ричард” биографик драмасини карьерасидаги энг сара фильмлар қаторига қўшди.
Смит дастлаб баъзи лойиҳаларда иштирок этишни истамаган, аммо фильмларнинг келажакда қандай муваффақиятга эришиши ҳақида яхши тасаввурга эга менежери ва бизнес шериги ҳар сафар уни кўндирган.
Уилл Смит ҳозирда “Охиригача ёмон йигитлар” фильми устида иш олиб бормоқда. Лойиҳа тугагач, актёр “Мен афсонаман” фильмининг давоми билан шуғулланади.
“Мазкур фильмни шундайлигича қолдирмоқчи эдим, лойиҳа давоми бўйича ажойиб ғоя билан танишиб чиққач, “ Мен афсонаман”нинг давомида суратга тушишга қарор қилдим”, — дейди актёр.
Изоҳ (0)