Машҳур фильмлардаги ўрнак олишимиз керак бўлган энг жасур ва фидойи қаҳрамонларни эслаймиз.
“Айиқ”
Муаммоли вазиятда бошқарув ўз қўлига олган: Кармен Берзатто
Карми — 20 ёшида карьерасида мисли кўрилмаган юксакликка эришган ёш ошпаз. У кўплаб ошпазлик мукофотларига, Қўшма Штатлардаги энг яхши ресторанларда ишлаш тажрибасига эга, аммо унинг ажойиб муваффақияти узоққа чўзилмайди. Акаси вафотидан сўнг Карми премиум муассасаларни ташлаб, Чикаго чеккасида мерос бўлиб қолган кафеда иш бошлайди. Ошпазнинг олдида имконсиз нарса бор — оилавий сендвич дўконини Мишел даражасига кўтариш, истеъмолчилар назорати эса кўплаб қонунбузарликларни аниқлаган, кафенинг собиқ эгаси қарзга ботган ва маҳаллий ошпазлар ўнлаб йиллар давомида синовдан ўтган рецептни ўзгартиришни хоҳламайди. Берзаттода бу қийин вазифани бажариш учун атиги 12 ҳафта бор. Қаҳрамон ўз мисолида бир қарашда эришиб бўлмайдиган нарсалар қандай қилиб чексиз матонат, юзлаб хатолар ва ўз ишига ишонч билан амалга ошишини кўрсатади.
“Ўйинлар”
Йўқотилгандек туюладиган, аммо буткул ўчмаган ишонч: Виктор Ходаков
Бутун дунё томоша қиладиган тадбирни ташкил қилишда қандай чарчамаслик мумкин? Виктор Ходаков — 1980 йилги Олимпиада ташкилий қўмитасининг раиси ва уни тайёрлашда иштирок этган барча бўлимларнинг ҳаракатлари учун жавобгар шахс. Арена ва стадионлар ҳали тайёр эмас, Олимпиадага бир йилдан камроқ вақт қолган, бюрократик тартиб-қоидалар эса барча ишларни секинлаштирмоқда. Аммо Брежневнинг ўзи Олимпиадани бекор қилиш ҳақида гапирганда ҳам Ходаков таслим бўлмайди, юзага келган муаммоларни қаттиққўллик билан ҳал қилишга ҳаракат қилади.
“Қасоскорлар: хотима”
Фидойи одам: Тони Старк
Даҳо, миллиардер, хайриячи... ва ҳақиқий қаҳрамон. Тони Старк нафақат дунёни қутқарадиган суперқаҳрамон, балки ўртоқлари учун кўп нарсаларни қилишга тайёр бўлган яхши дўстдир. Бефарқ ва истеҳзоли бойнинг шахсияти ортида қўшниларига нисбатан меҳрибонлик ва ғамхўрлик ётади. Старк Қасоскорларни топишга ёрдам беради ва жамоанинг ҳомийси бўлади, у ҳатто нафақага чиқмоқчи бўлса ҳам ҳамкасблари билан хавфли миссияларда қатнашади. Суперқаҳрамонлар жамоаси ҳақидаги саганинг финалида Тони ўзини қурбон қилади — у бошқалар ҳаётини сақлаб қолиш учун ёвуз одамнинг қўлқопини кияди.
“Қаттиққўл хоним”
Ўзининг қадр-қимматини ҳурмат қилган қиз: Андреа Сакс
Энди — моса соҳасида омадли карьера қуришни орзу қиладиган ёш ва амбицияли журналист қиз. Аммо унинг мода нашриётида бош муҳаррир ёрдамчиси сифатидаги биринчи иши барча орзуларини чилпарчин қилади — раҳбари тажрибасиз Андреа учун имконсиз бўлиб кўринган бемаъни талабларни илгари сурувчи ниҳоятда қаттиққўл аёл бўлиб чиқади. Афтидан, мағрур Миранда Пристлининг илтифотини қозонишнинг иложи йўқдек туюлади. Бироқ уйқусиз тунлар, ҳамкасблар томонидан таҳқирлаш ва шахсий ҳаёти учун вақт етишмаслигидан сўнг, қаҳрамон ўз раҳбаринининг ҳурматини қозонишга муваффақ бўлади. Албатта, бундай тажриба руҳий саломатликда ўз изини қолдирмайди, аммо журналистнинг қатъиятлилиги унга ажойиб имкониятларни очиб беради.
“Токи ҳаёт эканмиз”
Кексалик ҳаёт завқини йўқотиш учун сабаб бўлмаслигини исботлаганлар: Эдвард Коул ва Картер Чамберс
Ушбу фильмда иккита асосий қаҳрамон бор, лекин уларни ҳаётларининг охиригача бажарилиши керак бўлган истаклар рўйхати бирлаштиради. Эдвард ва Картер қайғули шароитда учрашади: иккала эркак ҳам жиддий ташхис билан касалхонага ётқизилган. Бу учрашувни тақдирдан деб тушунган билимдон автомеханик ва кекса миллиардер умрининг қолган ойларини ўзлари истагандек ўтказишга қарор қилади. Улар биргаликда турли мамлакатларга саёҳат қилишади, шу йиллар давомида ҳис қилмаган нарсалардан завқланишади. Қаҳрамонлар ҳаётнинг ўткинчилиги ҳақида ўйлашга мажбур қилади.
“Стрим”
Муаммоларни бошдан кечиради ва уларга ечим топади: Жора Левров
Ўрта мактабда ҳукм сураётган ҳақорат ва адолатсизликка қандай курашиш мумкин? Кўп йўллар бўлиши мумкин, аммо Жоранинг ўз усули бор: янги ўқув муассасасига келгандан сўнг, ўспирин синфдошлари ва ўқитувчиларининг масхараларига дуч келади ва нотўғри қарашларга қарши курашишга қарор қилади. Камера ўрнатилган шлем ёрдамида. Айнан шу кўринишда Левров ҳар куни мактабга келади, атрофида бошдан кечирган ва кўрган ҳамма нарсани интернетда эфирга узатади. Ихтиро самарали бўлиб чиқади ва тез орада атрофдагилар уларнинг барча ҳаракатлари оммага эътиборида эканини тушуна бошлайди. Жора аста-секин ўз мақсадига эришади ва одамларнинг ўзига бўлган муносабатини ўзгартиради. Замонавий муаммолар замонавий ечимларни талаб қилади.
“Бахт изидан”
Оиласи учун ҳамма нарсага тайёр одам: Крис Гарднер
Ёлғиз ота Крис катта қарзга ботган. Рафиқаси биалн ажрашиш ва стартапидаги муваффақиятсизликлардан сўнг, Гарднер ўғли билан кўчада қолади, тунни метродаги ҳожатхонада, методистлар черковининг бошпанасида ўтказади. Тўланмаган кредитлар, жарималар тўпланиб боради, ҳатто ўғлига ейишга нарса олиб беришга ҳам пули йўқ. Бундай яшаб бўлмаслигини англаган эркак брокерлик фирмасида амалиёт ўташга рози бўлиб, оиласининг ҳаётини тубдан ўзгартиришга қарор қилади. Бироқ битта “лекин” бор — биринчи маошингизни фақат олти ойдан кейин оласиз ва фақат худди шундай рақибларнинг 20 таси ичида энг яхшиси бўлиши шарти билан. Қаҳрамон кичик Кристофер учун ҳамма нарсани қилади ва дастурни бажариш учун куч топади. Албатта, фильм бахтли хотима билан якунланади: Уилл Смит қаҳрамони чўққиларни забт этади, қийинчиликларга қарамай, ўз мақсадига эришишга илҳомлантиради.
Изоҳ (0)