Farg‘ona viloyati Rishton tumanida bir kunda Damas bilan bog‘liq ikki yo‘l-transport hodisasi sodir bo‘ldi.
Ma’lum qilinishicha, Rishton tumanida Damas haydovchisi qarama-qarshi yo‘nalishga o‘tib ketib, ag‘darilgan. Oqibatda 1980-yilda tug‘ilgan fuqaroning Tracker avtomobili bilan to‘qnashgan. Rul boshqaruvida esa 2004-yil tug‘ilgan yigit bo‘lgan.
YTH oqibatida yigit shifoxonada vafot etgan. Hozirda boshqa fuqarolarga tibbiy yordam ko‘rsatilmoqda.
Xuddi shu kuni, kunning ikkinchi qismida Rishton tumanidagi yana bir avtohalokat sodir bo‘lgan. 28 yoshli haydovchi me’yordan oshgan tezlikda harakatlangan. Damas avtomobili qarama-qarshi yo‘nalishdan kelayotgan Nexia bilan to‘qnashgan.
Mazkur YTH oqibatida esa Damas haydovchisi tan jarohati olib shifoxonaga yuborilgan, lekin u ham vafot etgan.
25-may kuni Namanganda Nexia-3 YTHga uchrab, haydovchisi bilan birga yonib ketgandi. Farg‘onada Nexia haydovchisi bosib ketgan velosipeddagi 12 yoshli bola vafot etdi. Haydovchi uch yil muddatga barcha turdagi transport vositalarini boshqarish huquqidan mahrum qilinib, 5 yilga ozodlikdan mahrum etildi. 10-mayda Toshkent viloyati Bekobod tumanida Damas “peshexod”dan o‘tayotgan piyodani bosib ketdi.
8-iyun kuni Toshkentda motosikl va skuter o‘rtasida sodir bo‘lgan yo‘l-transport hodisasida ikki nafar haydovchi vafot etgan.
13-iyun kuni Buxoroda 17 yoshli bola boshqaruvidagi Lacetti yuk mashinasi bilan to‘qnashgan. 18-iyunda esa Xorazmda Tico ag‘darilib ketishi oqibatida 18 yoshli yigit halok bo‘lgan.
30-iyunda Sirdaryoda Lacetti va avtobus to‘qnashuvida bir kishi halok bo‘lgan.
YTHlar statistikasi
O‘zbekistonda 2025-yilning dastlabki uch oyida YTH sodir etishi oqibatida 891 nafar shaxs sudlandi.
2024-yil davomida Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) bilan 3 321 nafar shaxs sudlangan. Ularning 917 nafariga ozodlikdan mahrum qilish jazosi, 2 404 nafariga esa ozodlikdan mahrum qilish bilan bog‘liq bo‘lmagan jazolar tayinlangan.
2025-yilning I-choragi mobaynida ushbu modda bilan 891 nafar shaxs sudlanib, ularning 173 nafariga ozodlikdan mahrum qilish jazosi tayinlangan.
Shuningdek, 718 nafar fuqaroga ozodlikdan mahrum qilish bilan bog‘liq bo‘lmagan jazolar tayinlandi.
Izoh (0)