Фарғона вилояти Риштон туманида бир кунда Damas билан боғлиқ икки йўл-транспорт ҳодисаси содир бўлди.
Маълум қилинишича, Риштон туманида Damas ҳайдовчиси қарама-қарши йўналишга ўтиб кетиб, ағдарилган. Оқибатда 1980 йилда туғилган фуқаронинг Tracker автомобили билан тўқнашган. Рул бошқарувида эса 2004 йил туғилган йигит бўлган.
ЙТҲ оқибатида йигит шифохонада вафот этган. Ҳозирда бошқа фуқароларга тиббий ёрдам кўрсатилмоқда.
Худди шу куни, куннинг иккинчи қисмида Риштон туманидаги яна бир автоҳалокат содир бўлган. 28 ёшли ҳайдовчи меъёрдан ошган тезликда ҳаракатланган. Damas автомобили қарама-қарши йўналишдан келаётган Nexia билан тўқнашган.
Мазкур ЙТҲ оқибатида эса Damas ҳайдовчиси тан жароҳати олиб шифохонага юборилган, лекин у ҳам вафот этган.
25 май куни Наманганда Nexia-3 ЙТҲга учраб, ҳайдовчиси билан бирга ёниб кетганди. Фарғонада Nexia ҳайдовчиси босиб кетган велосипеддаги 12 ёшли бола вафот этди. Ҳайдовчи уч йил муддатга барча турдаги транспорт воситаларини бошқариш ҳуқуқидан маҳрум қилиниб, 5 йилга озодликдан маҳрум этилди. 10 майда Тошкент вилояти Бекобод туманида Damas “пешеход”дан ўтаётган пиёдани босиб кетди.
8 июнь куни Тошкентда мотоцикл ва скутер ўртасида содир бўлган йўл-транспорт ҳодисасида икки нафар ҳайдовчи вафот этган.
13 июнь куни Бухорода 17 ёшли бола бошқарувидаги Lacetti юк машинаси билан тўқнашган. 18 июнда эса Хоразмда Tico ағдарилиб кетиши оқибатида 18 ёшли йигит ҳалок бўлган.
30 июнда Сирдарёда Lacetti ва автобус тўқнашувида бир киши ҳалок бўлган.
ЙТҲлар статистикаси
Ўзбекистонда 2025 йилнинг дастлабки уч ойида ЙТҲ содир этиши оқибатида 891 нафар шахс судланди.
2024 йил давомида Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) билан 3 321 нафар шахс судланган. Уларнинг 917 нафарига озодликдан маҳрум қилиш жазоси, 2 404 нафарига эса озодликдан маҳрум қилиш билан боғлиқ бўлмаган жазолар тайинланган.
2025 йилнинг I-чораги мобайнида ушбу модда билан 891 нафар шахс судланиб, уларнинг 173 нафарига озодликдан маҳрум қилиш жазоси тайинланган.
Шунингдек, 718 нафар фуқарога озодликдан маҳрум қилиш билан боғлиқ бўлмаган жазолар тайинланди.
Изоҳ (0)