Farg‘ona viloyati Bag‘dod tumanida Damas rusumli mashinani boshqargan 4-sinfda o‘qiydigan bola 2 yoshli qizni urib ketdi, deya xabar bermoqda “Xalq so‘zi Online”.
Qayd etilishicha, 2020-yilning 10-noyabr kuni Farg‘ona viloyatining Bag‘dod tumanida otasiga tegishli Damas avtomashinasini haydab, mahalladagi savdo do‘konidan oziq-ovqat mahsulotlari olib kelishga chiqqan 11 yoshli I. qo‘shni qizaloq — 2 yoshli I.ni urib yuborgan.
Avtohalokat natijasida sarosimaga tushib qolgan bolakay voqea joyidan qochib ketgan. Afsuski, qizchaga o‘z vaqtida tibbiy yordam ko‘rsatilmagani sababli u voqea joyida vafot etgan.
Ma’lum bo‘lishicha, tumandagi umumta’lim maktablaridan birining 4-sinf o‘quvchisi bo‘lgan bolakay uyi oldida otasi kaliti bilan qoldirgan Damas’ni ruxsatsiz haydagan va boshqaruvni eplay olmay yuqoridagi hodisani sodir etgan.
Bag‘dod tumani IIB Yo‘l harakati xavfsizligi guruhi katta inspektori Ahror Jakbarovning ma’lum qilishicha, ayni paytda mazkur holat yuzasidan jinoyat ishi qo‘zg‘atilgan va dastlabki surishtiruv ishlari olib borilmoqda.
Avvalroq Surxondaryo viloyati Uzun tumanida sodir bo‘lgan YTH oqibatida 4 yoshli bola hayotdan ko‘z yumgani, Navoiyda 19 yoshli haydovchi boshqaruvidagi Nexia ag‘darilib ketishi oqibatida bir kishi halok bo‘lgani hamda Yunusobodda yuz bergan YTHda voyaga yetmagan haydovchi halok bo‘lgani haqida xabar berilgandi.
Izoh (0)