Buxoro viloyatining Kogon tumanida mart oyida avtobus va yuk mashinasi ishtirokida YTH sodir bo‘lgani, ag‘darilgan avtobus ichida maktab o‘quvchilari bo‘lgani haqida xabar berilgan edi. Bolalar teatrga olib ketilayotgan bo‘lgan. Mazkur holat yuzasidan avtobus haydovchisi O.Sh.ga nisbatan 20-sentyabr kuni jinoyat ishlari bo‘yicha Kogon shahar sudi ishni ko‘rib chiqqan. Bu haqda Oliy sud matbuot xizmati “Daryo”ga ma’lum qildi.
Sud ishi ma’lumotlariga ko‘ra, avtohalokat natijasida voqea joyida bir nafar va shifoxonada yana bir nafar maktab o‘quvchisi vafot etgan, bundan tashqari o‘ndan ortiq bola tan jarohati olgan.
Avtobus haydovchisi O.Sh. Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) bilan ayblangan. U sudda aybiga to‘liq iqror bo‘lgan. Lekin o‘qituvchilarga o‘quvchilarni kuzatib borish uchun ichki ishlar xodimlari yoki Milliy gvardiya xodimlari biriktirilganmi, deb so‘raganida ular javob bermaganini aytgan.
Ayblanuvchining qo‘shimcha qilishicha, keyinroq ikki nafar Milliy gvardiya xodimi kelgan, lekin avtobusga chiqmagan. Avtobusda 36 nafardan ortiq o‘quvchi bo‘lgani sababli to‘lib qolganini, kuzatib borish uchun ichki ishlar xodimlari hamda avtobusga “Bolalar” yozuvini yozish kerakligini aytganida o‘qituvchilar unga gapirmasdan avtobusni haydashini aytishgan.
Bosh prokuratura bergan ma’lumotga ko‘ra, o‘z ishiga bepisandlarcha qaragan shaxslarga nisbatan Jinoyat kodeksining 207-moddasi (mansabga sovuqqonlik bilan qarash) bilan jinoyat ishi qo‘zg‘atilgan.
Sud hukmiga ko‘ra, sudlanuvchi O.Sh. Jinoyat kodeksining 266-modda 3-qismi “a” bandida nazarda tutilgan jinoyatni sodir qilganlikda aybli deb topilgan. Unga shu modda bilan 3 (uch) yil muddatga barcha turdagi transport vositalarini boshqarish huquqidan mahrum qilinib, 9 yil muddatga ozodlikdan mahrum qilish jazosi tayinlangan.
Hukm qonuniy kuchga kirgach, sudlanuvchi O.Sh.dan avtobus bilan to‘qnashgan yuk mashinasiga nisbatan 61 million 409 ming so‘mlik moddiy zarar “Gala Osiyo Soxtimon” xususiy korxonasi foydasiga undirilishi qayd etilgan.
Sud bolalarga yetkazilgan moddiy zararni undirish uchun fuqarolik ishlari bo‘yicha sudga murojaat qilish huquqi tushuntirilgan.
Izoh (0)