Qozog‘istonda avtohalokat sabab onasidan ayrilgan o‘zbekistonlik qiz vatanga qaytarildi. Bu haqda bolalar ombudsmani xabar berdi.
Keltirilishicha, Qoraqalpog‘istonning Beruniy tumanida yashovchi fuqaro E.A. tomonidan bolalar ombudsmaniga murojaat yo‘llanib, unda uning 2010-yilda tug‘ilgan nabirasi E.M.ning huquqiy holati bo‘yicha amaliy yordam so‘ralgan.
Murojaatda aytilishicha, E.A.ning qizi D.R. bir necha yil avval Qozog‘iston fuqarosiga turmushga chiqqan. Farzandi E.M. Beruniy tumanida tug‘ilgan va O‘zbekiston fuqarosi hisoblanadi. Shunga qaramay, onasi tomonidan unga Qozog‘istonda ham tug‘ilganlik to‘g‘risidagi guvohnoma rasmiylashtirilgan.
2024-yil avgust oyida sodir bo‘lgan yo‘l-transport hodisasi oqibatida qizi vafot etgan. Shundan so‘ng, voyaga yetmagan E.M. Qozog‘istonda ota-ona qaramog‘isiz qolgan. Bu holat yuzasidan buvi nabirasini O‘zbekistonga qaytarishda yordam so‘rab murojaat qilgan.
Mazkur murojaat Bolalar ombudsmani tomonidan ko‘rib chiqilib, Ichki ishlar vazirligi hamda O‘zbekistonning Qozog‘istondagi Bosh konsulligi bilan hamkorlikda zarur chora-tadbirlar ko‘rildi. Tezkor tartibda voyaga yetmagan E.M.ning hujjatlari rasmiylashtirilib, uning O‘zbekistonga qaytarilishi ta’minlandi.
2025-yil 12-may kuni voyaga yetmagan qiz xolasi hamrohligida O‘zbekistonga olib kelindi va rasmiy tartibda buvisi qaramog‘iga topshirildi. Hozirda voyaga yetmagan qiz bo‘yicha vasiylikni rasmiylashtirish ishlari qonunchilikka muvofiq davom ettirilmoqda.
Xorijdan O‘zbekistonga qaytarilgan bolalar
2024-yil avgust—sentyabr oylarida xorijda ota-ona qaramog‘idan mahrum bo‘lgan 34 nafar bola O‘zbekistonga qaytarilgandi. Oktyabr oyida Rossiyada qarovsiz qolgan 8 oylik chaqaloq O‘zbekistonga, ota-onasi bag‘riga qaytarildi. Moskvadagi voyaga yetmagan huquqbuzarlarni vaqtincha saqlash markazidan 4 nafar bola O‘zbekistonga olib kelindi. O‘sha oyda Turkiyada ota-onasining qarovisiz qolib ketgan uch nafar voyaga yetmagan bola O‘zbekistonga qaytarildi. Noyabrda Dubayni tark etish taqiqlangan o‘zbekistonlik bolaga vatanga qaytishiga yordam berildi. Dekabrda Rossiyada ota-ona qaramog‘isiz qolgan 15 nafar bola O‘zbekistonga qaytarildi.
Shuningdek, Rossiyaning Tiva Respublikasi Oq Dovurak shahrida vaqtincha ishlayotgan va hujjatlarini yo‘qotgan to‘rt nafar O‘zbekiston fuqarosi vatanga qaytarilgandi.
Izoh (0)