Namangan viloyatida bir nechta qoidabuzarliklar sodir etib, qilmishini ijtimoiy tarmoqlarga joylagan haydovchilarga chora ko‘rildi. Bu haqda “BuKun” dasturida maʼlum qilindi.
Qayd etilishicha, yaqinda bir bloger tomonidan sodir etilgan qoidabuzarliklar jamoatchilik eʼtiboriga tushgan. U Damas boshqaruv vaqtida rulga tovoqdagi oshni qo‘ygan va uni yegan holda harakatlangan.
Shundan so‘ng u aynan shu avtomobil ichiga ofis va xonadonlar uchun mo‘ljallangan konditsionerni o‘rnatib, shaharning gavjum ko‘chalarida harakatlangan.
“Qilgan xatoyim qonunni buzishga va jarimaga sabab bo‘lishi aytildi. Mashinam jarima maydoniga olib kelindi. Mashinani o‘z holatiga qaytardik”, deydi Damas haydovchisi.
Yana bir holatda esa Nexia’ning ballonlaridan biri olib tashlanib, uch g‘ildirakda harakatlanilgan. Haydovchiga nisbatan, maʼmuriy bayonnomalar rasmiylashtirilib, avtomashina jarima maydoniga joylashtirilgan.
Shavkat Mirziyoyev 15-may kuni o‘tkazgan videoselektor yig‘ilishida viloyatlarda, ayniqsa, Namanganda o‘quvchilarga avtomobilni ijaraga berish avj olgani oqibatida har oyda 10-15 nafar yoshlar majruh bo‘lib qolayotganini, o‘lim bilan tugayotgan holatlar ham ko‘pligini aytgandi.
Shu munosabat bilan bolalarga mashina boshqarishni berganlik uchun javobgarlikni kuchaytirish bo‘yicha qonun loyihasini tayyorlash topshirildi.
Namanganda avtomobilni voyaga yetmaganlar boshqarishi oqibatidagi YTHlar
2024-yilning aprel oyida Namanganda 11-sinf o‘quvchisi Lacetti’da ikki talabani urib yuborgandi. 2024-yilning noyabrida esa Namangan shahrida 9-sinf o‘quvchisi boshqargan Gentra avtomobili ishtirokida avtohalokat sodir bo‘lgandi. 2025-yil aprelida Namangan viloyatining Davlatobod tumani haydovchilik guvohnomasiga ega bo‘lmagan maktab o‘quvchisi Nexia-3 mashinasini boshqarib borib, yo‘lning qarama-qarshi tomoniga chiqib ketgan va yuk avtomashinasi bilan to‘qnashgandi. Namangan viloyatining Uchqo‘rg‘on tumanida esa 10 sinf o‘quvchisi otasiga tegishli Cobalt’da 4-sinf o‘quvchisini urib yuborib, uning o‘limiga sababchi bo‘lgandi.
Namangan viloyati YHXB boshlig‘i Mansur Gaziyev avtomobillarni ijaraga beruvchi Telegram guruh va kanallarining aksariyat a’zolari maktab o‘quvchilaridan iboratligini aytgandi.
Izoh (0)