Ijtimoiy tarmoqda 12-sentabr kuni 14 yoshli o‘g‘li mashina urib yuborishi oqibatida vafot etgani aytilgan fuqaroning videomurojaati tarqaldi. Uning so‘zlariga ko‘ra, ushbu avtohalokat Milliy gvardiya xodimining Matiz avtomobilini mast holda boshqargani sabab bo‘lgan. U qarama-qarshi tomondan kelayotgan Damas yo‘lini to‘sib qo‘ygan, Damas haydovchisi rulni o‘ngga burishi oqibatida yo‘l chetida turgan piyodani urib yuborgan.
YHXBB ma’lumotiga ko‘ra, ushbu voqea 12-sentabr kuni soat 01:30 larda Toshkent viloyati, O‘rtachirchiq tumani hududidan o‘tgan 4R20 “Qorasuv –Bekobod” avtomobil yo‘lining 8-kilometrida yuz bergan. Matiz 1980-yilda tug‘ilgan T.M. boshqaruvida, Damas esa 1978-yilda tug‘ilgan G.E. boshqaruvida bo‘lgan.
YTH oqibatida Damas haydovchisi boshqaruvni yo‘qotib, yo‘lning o‘ng tomonida turgan 2007-yilda tug‘ilgan piyoda A.K.ni urib yuborgan. Oqibatda 14 yoshli o‘spirin olgan og‘ir tan jarohatlaridan shifoxonada vafot etgan.
Olib borilgan dastlabki tergov oldi surishtiruv jarayonlarida Matiz haydovchisi haqiqatan ham mast holda ekanligi aniqlangan. Mazkur YTH yuzasidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) bilan jinoyat ishi qo‘zg‘atilgan.
Keyinroq Milliy gvardiya matbuot xizmati Matiz haydovchisi Milliy gvardiya xodimi emasligini ma’lum qildi.
“U oldin Toshkent shahar Qo‘riqlash boshqarmasining xodimi bo‘lgan va o‘z xohishi bilan ishdan bo‘shatilgan. Uni oldindan tanigan fuqarolar tomonidan berilgan ma’lumotga ko‘ra, ijtimoiy tarmoqlarda tarqatilgan videotasvirda Milliy gvardiya xodimi deb yodga olingan”, — deyiladi Milliy gvardiya xabarida.
Izoh (0)