Polshalik aktrisa Barbara Brilska tomoshabinlarning sevimli aktrisasiga aylanib ulgurgani ayni haqiqat. Bugun, 5-iyun kuni aktrisa 84 yoshini nishonlamoqda. Uning hayoti yorqin, unutilmas voqealarga boy bo‘lgan, ammo shunga qaramay, umidsizlik va yo‘qotishlarsiz kechmagan.
Aktrisa Barbara Brilska hali ham juda jozibali. Uning 15 yoshida birinchi rolini ijro etganidan ajablanmasa ham bo‘ladi. O‘shanda rejissyor Antoni Boxdzevich uni “Baxt kovushlari” kartinasiga taklif qiladi. Shundan keyin Barbara kinoda rol ijro etishni orzu qila boshlaydi va oxir-oqibat aktrisa bo‘ladi. U 1965-yilda 24 yoshida “Fir’avn” filmidagi roli bilan vatani Polshada mashhurlikka erishadi.
Omadsiz birinchi nikoh
Mashhurligi orqasidan ko‘plab muxlislarga ega bo‘lgan bir paytda Barbara turmush qurishga qaror qiladi. Aktrisa 20 yoshida matematik Yan Borovets bilan oila quradi. Ammo bu nikoh baxtli yakun topmaydi.
Birinchi nikohida omadsizlikka uchragan Barbara atrofidagi erkaklarga razm sola boshlaydi. O‘sha paytda, aktrisa ta’kidlaganidek, u eng yaxshisini tanlashi mumkin edi.
Shunday qilib, uning hayotida kelishgan aktyor Yeji Zelnik paydo bo‘ladi. Juftlik chindan ham bir-biriga juda mos edi, ammo ularning sevgisi qisqa bo‘ldi.
Bu Barbaraning hayotida bu eng tez nikoh va ajralish edi. Yeji barcha ayollarga yuragidan joy beruvchi xotinboz bo‘lib chiqdi. Oilali bo‘lishiga qaramay, bunday hayotdan voz kechishni xohlamadi. Tabiiyki, aktrisa bunday munosabatga toqat qilolmasdi va erini tark etdi. Ushbu nikoh bir yilga ham bormadi.
Bir umrlik sevgi
1969-yilda “Oq bo‘rilar” filmining suratga olish jarayonida Barbara yugoslaviyalik aktyor Slobodan Dmitriyevich bilan uchrash boshladi. Aktrisa haligacha uni hayotidagi chinakam sevgi deb ataydi. Haqiqatan ham agar aktyorning onasi er-xotinning ishlariga aralashmaganida, bu baxtli yakunlangan nikoh bo‘lishi mumkin edi.
Ona o‘g‘lining yaxshigina davlatga ega bo‘lgan boy kelinga uylantirishini orzu qilgan va u bu munosabatlarni buzish uchun qo‘lidan kelgan hamma narsani qildi. Slobodanning onasi eng oddiy (ammo qabihona) yo‘ldan bordi: u Barbaradan kelgan xatlarni yashira boshladi va o‘g‘liga yengiltabiat aktrisa uni allaqachon unutib yuborganligini qayta-qayta aytishdan charchamadi. Va nihoyat sevishganlar o‘rtasidagi munosabatlar buzildi. Oradan vaqt o‘tgach, Dmitriyevich yangi oila qurdi, bu esa Brilskaning chuqur depressiyaga tushishiga sabab bo‘ldi.
“Taqdir hazili”
Ko‘pchilikda bo‘lganidek, aktrisa qalb yaralarini mehnat bilan davoladi, alamini ishidan oldi. 1972-yilda ochiq sahnalarga boy bo‘lgan “Sevgi anatomiyasi” filmi ekran yuziga chiqdi, Barbara ushbu filmdagi rolga qo‘rqmasdan rozi bo‘ldi. Film namoyishidan so‘ng tanqidchilar aktrisa karyerasining qulashini taxmin qila boshladi. Ammo ular adashgan edi — ayni shu paytda Eldar Ryazanov aktrisaning iste’dodiga e’tibor qaratdi va unga “Taqdir hazili yoki qushdek yengil bo‘ling” filmidagi bosh rolni taklif qildi. Hatto Barbaraning polyakcha talaffuzi ham rejissyorni bu qaroridan to‘xtata olmadi.
Brilskaning o‘ziga ham ziyoli rus tili o‘qituvchisi rolini o‘ynash g‘oyasi juda yoqdi. 1975-yilda film ekranlarga chiqishi bilan Brilska mashhur bo‘lib ketdi. Mazkur filmdagi roli uchun aktrisa ko‘plab mukofotlarga sazovor bo‘ldi, ammo yuqori doiralarda u bunga loyiq emasligi haqida gap-so‘zlar ko‘paydi. Bu ham yetmagandek, filmda Alla Pugachyova ovozi bilan qo‘shiq kuylagan Barbaraning xonanda bilan munosabatlari yomonlashdi. O‘tgan xafagarchiliklarni unutish va do‘stlashish uchun ikkisiga ham yillar kerak bo‘ldi.
So‘nggi urinish
70-yillarning boshlarida Barbara yana sevib qoldi va ko‘p o‘tmay turmushga chiqdi. Uning bu safargi tanlagani ginekolog Lyudvig Kosmal edi. Bu nikoh 18 yil davom etdi, lekin Brilskaga ikki farzand va cheksiz og‘riqdan boshqa hech narsa bermadi.
1973-yilda aktrisa qizli bo‘ldi, unga Barbara (erkalatib — Basya) deb ism qo‘ydi. To‘qqiz yildan so‘ng u kutilmaganda yana homilador bo‘ldi. Shunday qilib, 1982-yilda o‘g‘li tug‘ildi, uni otasining ismi bilan Lyudvig deb atashdi.
Aynan bolalari uchun ham Barbara erining xiyonatiga ko‘z yumdi, uni tashlab ketmadi. Bu vaqtga kelib bir paytlar uni ruhiy tushkunlikdan olib chiqqan, muvaffaqiyatlaridan faxrlangan odamdan asar ham qolmagandi. Lyudvig hasadgo‘y, qo‘pol, shafqatsiz bo‘lib qoldi.
“U menga noloyiq edi. U butun kuchim va sevgimdan foydalandi, pul haqida-ku aytmasa ham bo‘laveradi. U bir oyda topgan pulni men bir kunda topardim. Bundan tashqari, u ichardi va hali ham ichadi”, deb tan oladi Brilska.
Kosmalning o‘zi esa mashhur xotini haqida shunday deydi:
“Men xotinimdan nafratlanaman, chunki uni o‘zim yurgan boshqa ayollar bilan har gal solishtiraman va u har doim yutib chiqadi”.
Nihoyat aktrisa bu holatga chiday olmadi: 18 yillik turmushidan keyin erini tashlab ketdi, bunday munosabatlarga loyiq emasligini tushunib yetdi.
Endi qanday yashayman?
Barbaraning hayotidagi mudhish fojia 1993-yil 15-mayda sodir bo‘ldi. O‘shanda uning 20 yoshli qizi Basya avtohalokat tufayli vafot etdi — u onasi singari intiluvchan, juda iste’dodli aktrisa va model edi.
O‘sha kuni Basya yigiti Saveliy Julavskiy bilan mashinada ketayotgan bo‘lgan. Yigit mashina boshqaruvini yo‘qotib, jiddiy baxtsiz hodisaning aybdoriga aylandi. Saveli omon qoldi, ammo Basya tez yordam kelguniga qadar voqea joyida vafot etdi ...
“Uning haydovchilik guvohnomasini olganiga endigina olti oy bo‘lgandi. Bu fojia uning aybi bilan sodir bo‘ldi. Saveliy menga mashina atrofida qanday yugurgani va “Basya, o‘lma!” deb baqirganini aytib berdi. O‘shanda qizim ko‘zini ikki marta ochib yumgan, shundan so‘ng qaytib ochmagan”, deb eslaydi aktrisa bu haqda gapirishga o‘zida kuch topa olgan vaqtda.
1993-yil 15-maydan so‘ng Barbaraning hayoti ikkiga bo‘lindi: avval va keyin. Holat shu darajaga borib yetdiki, hatto u o‘z joniga qasd qilmoqchi ham bo‘ldi, ammo o‘g‘li tufayli bunga jur’at eta olmadi. O‘g‘li unga bu dunyoda mavjud bo‘lishiga yordam berdi: faqat shu yolg‘izgina farzandi uchungina Brilska ertalab turishga va har bir yangi kunni yashashga o‘zida kuch topa oldi.
Uch yil davomida u deyarli uyidan chiqmadi, hech kimni ko‘rishni xohlamadi, faqat tinmay yig‘ladi. 16 yil o‘tgachgina nihoyat o‘ziga keldi va hayotdan zavqlana boshladi. Hozirda aktrisaning ikki nafar ajoyib nabirasi bor.
Bir haftadan ortiq vaqtni rejalashtirmang
Bugungi kunda aktrisa Polshada — o‘zi dizayni ustida ishlagan uyida yashaydi. O‘g‘li ham oilasi bilan unga yaqin joyda, lekin uni Barbara o‘zi istaganidek tez-tez ko‘rolmaydi. Brilskaning ta’kidlashicha, qizi vafotidan keyin u hozirgi kun bilan yashashga va bir haftadan ortiq vaqtga reja tuzmaslikka harakat qiladi. Shuningdek, aktrisa 100 yoshga kirib vafot etgan onasi kabi uzoq umr ko‘rishni xohlamaydi. Bu 2018-yilda sodir bo‘lgandi: o‘shanda aktrisaning sobiq eri va bolalarining otasi Lyudvig Kosmal ham vafot etgandi.
“Men yashashni xohlamayman, kuchim yetmaydi. Men har doim juda hayotsevar bo‘lganman. Hozir ham nimadir qilishni xohlayman, lekin bunga quvvatim yo‘q. Yuz yilgacha yashaydigan aktyorlar bor, lekin men buni xohlamayman. Bundan tushkunlikka tushmayman ham”, deydi aktrisa.
Izoh (0)