Samarqandda uyidan avtomobilni olib qochib, “So‘nggi qo‘ng‘iroq” tadbiriga ketayotgan 8-sinf maktab o‘quvchisi YPX xodimlaridan qochishga urindi. Bu haqda Yo‘l harakati xavfsizligi xizmati xabar berdi.
Maʼlum qilinishicha, voyaga yetmagan bola davlat raqam belgisini tushirib qoldirib yo‘lida davom etgan. O‘quvchining otasiga nisbatan chora ko‘rildi.
Holatni Samarqand shahar 37-maktab o‘quvchisi sodir etgan.
Umuman olganda bugun, “So‘nggi qo‘ng‘iroq” kuni soat 14:00 gacha respublika bo‘ylab voyaga yetmaganlar tomonidan avtomobil boshqarish bilan bog‘liq 256 ta holat aniqlandi.
Ular orasida 5-sinf o‘quvchisi ham mavjud.
Shavkat Mirziyoyev 15-may kuni o‘tkazgan videoselektor yig‘ilishida viloyatlarda, ayniqsa, Namanganda o‘quvchilarga avtomobilni ijaraga berish avj olgani oqibatida, har oyda 10-15 nafar yoshlar majruh bo‘lib qolayotganini, o‘lim bilan tugayotgan holatlar ham ko‘pligini aytgandi.
Shu munosabat bilan bolalarga mashina boshqarishni berganlik uchun javobgarlikni kuchaytirish bo‘yicha qonun loyihasini tayyorlash topshirildi.
Namanganda avtomobilni voyaga yetmaganlar boshqarishi oqibatidagi YTHlar
2024-yilning aprel oyida Namanganda 11-sinf o‘quvchisi Lacetti’da ikki talabani urib yuborgandi. 2024-yilning noyabrida esa Namangan shahrida 9-sinf o‘quvchisi boshqargan Gentra avtomobili ishtirokida avtohalokat sodir bo‘lgandi. 2025-yil aprelida Namangan viloyatining Davlatobod tumani haydovchilik guvohnomasiga ega bo‘lmagan maktab o‘quvchisi Nexia-3 mashinasini boshqarib borib, yo‘lning qarama-qarshi tomoniga chiqib ketgan va yuk avtomashinasi bilan to‘qnashgandi. Namangan viloyatining Uchqo‘rg‘on tumanida esa 10 sinf o‘quvchisi otasiga tegishli Cobalt’da 4-sinf o‘quvchisini urib yuborib, uning o‘limiga sababchi bo‘lgandi.
Namangan viloyati YHXB boshlig‘i Mansur Gaziyev avtomobillarni ijaraga beruvchi Telegram guruh va kanallarining aksariyat a’zolari maktab o‘quvchilaridan iboratligini aytgandi.
Izoh (0)