Namangan viloyatida voyaga yetmaganlarga transport vositasini ijaraga berish bo‘yicha bir sutkada (16-may kuni) 45 ta holat aniqlandi. Bu haqda YHXX matbuot xizmati xabar berdi.
Qayd etilishicha, viloyatda yo‘l-transport hodisalarining oldini olish, qo‘pol qoidabuzarliklarga qarshi kurashish maqsadida maxsus nazorat tadbirlari olib borildi. 24 soat ichida 2 mingdan ortiq qo‘pol qoidabuzarliklar aniqlanib, 756 ta transport vositasi jarima maydoniga qo‘yildi. 394 ta holatda tegishli hujjatsiz avtomashina boshqarish, 45 ta voyaga yetmaganlarga transport vositasini noqonuniy ijaraga berish holatlari aniqlandi.
Shavkat Mirziyoyev 15-may kuni o‘tkazgan videoselektor yig‘ilishida viloyatlarda, ayniqsa, Namanganda o‘quvchilarga avtomobilni ijaraga berish avj olgani oqibatida, har oyda 10-15 nafar yoshlar majruh bo‘lib qolayotganini, o‘lim bilan tugayotgan holatlar ham ko‘pligini aytgandi.
Shu munosabat bilan bolalarga mashina boshqarishni berganlik uchun javobgarlikni kuchaytirish bo‘yicha qonun loyihasini tayyorlash topshirildi.
Namanganda avtomobilni voyaga yetmaganlar boshqarishi oqibatidagi YTHlar
2024-yilning aprel oyida Namanganda 11-sinf o‘quvchisi Lacetti’da ikki talabani urib yuborgandi. 2024-yilning noyabrida esa Namangan shahrida 9-sinf o‘quvchisi boshqargan Gentra avtomobili ishtirokida avtohalokat sodir bo‘lgandi. 2025-yil aprelida Namangan viloyatining Davlatobod tumani haydovchilik guvohnomasiga ega bo‘lmagan maktab o‘quvchisi Nexia-3 mashinasini boshqarib borib, yo‘lning qarama-qarshi tomoniga chiqib ketgan va yuk avtomashinasi bilan to‘qnashgandi. Namangan viloyatining Uchqo‘rg‘on tumanida esa 10 sinf o‘quvchisi otasiga tegishli Cobalt’da 4-sinf o‘quvchisini urib yuborib, uning o‘limiga sababchi bo‘lgandi.
Namangan viloyati YHXB boshlig‘i Mansur Gaziyev avtomobillarni ijaraga beruvchi Telegram guruh va kanallarining aksariyat a’zolari maktab o‘quvchilaridan iboratligini aytgandi.
Izoh (0)