AQSHda sud Ilon Maskga tegishli Tesla kompaniyasiga qarshi da’voni ko‘rib chiqishni boshladi. Korporatsiyaga avtopilot rejimida harakatlangan avtomobilda halok bo‘lgan ayol sabab da’vo qo‘zg‘atilgan. Bu haqda Bloomberg xabar bermoqda.
Manbaga ko‘ra, gap 2019-yilda sodir bo‘lgan hodisa haqida ketmoqda. 20 yoshli qiz Tesla elektromobilida avtohalokatga uchrab halok bo‘lgan. Avtomobil avtopilot rejimida harakatlanayotgan paytda to‘xtab turgan furgonni “ko‘rmay qolgan” va katta tezlikda unga urilgan. Sud ushbu fojia uchun kim aybdorligini aniqlaydi — eng xavfsiz elektromobil ishlab chiqarishini da’vo qiladigan Tesla kompaniyasimi yoki mobil telefonini tushirib yuborgan haydovchi?
Tesla versiyasiga ko‘ra, baxtsiz hodisa haydovchi aybi bilan sodir bo‘lgan. Leon mashinaning avtopilot “rejimi”ni yoqqan, biroq smartfonini tushirib yuborib, uni olish uchun egilgan va shu bilan birga oyog‘ini tezlik pedali ustida qoldirgan. Natijada elektromobil yo‘ldan chiqib, to‘xtash joyiga kirgan va u yerdagi furgon bilan to‘qnashgan. Mask kompaniyasi o‘z bayonotida “avariya avtopilot tizimi bilan mutlaqo bog‘liq emas”ligini ta’kidlaydi. Shu bilan birga, Tesla 2019-yilda bunday holatning oldini olishi mumkin bo‘lgan hech qanday favqulodda to‘xtatish texnologiyasi mavjud bo‘lmaganini tan oldi.
Sud hujjatlariga ko‘ra, haydovchi boshqaruvidagi avtomobil soatiga 60 mildan ortiq (taxminan 96 km/soat) tezlikda T ko‘rinishidagi chorrahadan to‘xtamasdan o‘tib, yo‘l chetida to‘xtab turgan Chevrolet Tahoe avtomobilining yon tomoniga urilgan. Avtohalokat oqibatida 22 yoshli Naibel Benavides Leon halok bo‘lgan, uning yigiti, ushbu avtomobil egasi Dillon Angulo esa og‘ir jarohat olgan.
Da’vogarlar advokatlaridan biri Todd Poses sud hujjatlarida, avtopilot tizimidagi konstruktiv kamchiliklar avtomobilga to‘siqlarni, jumladan Chevrolet Tahoe’ni aniqlashga imkon bermaganini va natijada Leonning o‘limiga olib kelganini ta’kidlagan.
Avtopilotda harakatlanayotgan Tesla avtomobillari bilan bog‘liq baxtsiz hodisalar ilgari ham sodir bo‘lgan. Ammo bu ish sudgacha yetib kelgan kam sonli voqeliklardan biri. Agar korporatsiya yutqazsa, uni katta moliyaviy yo‘qotishlar kutmoqda.
Ilon Mask esa kelajak avtopilotli avtomobillarniki ekanini ta’kidlashda davom etmoqda va navigatsiya tizimlarini ishlab chiqishda xatolarga yo‘l qo‘yilganini rad etdi. Tesla avariyalar bo‘yicha marhumlarning qarindoshlari yoki jarohatlanganlar bilan sudlashgan holatlarda esa, deyarli har safar aybdor sifatida haydovchilar tan olingan.
Izoh (0)