Farg‘ona viloyatida 19 yashar yigit avtohalokat sodir qilib, o‘zi bilan birga bo‘lgan ikki tengdoshining o‘limiga sabab bo‘ldi. Bu haqda viloyat IIB xabar berdi.
Ma’lum qilinishicha, holat 29-avgust kuni soat 03:30 larda, Farg‘ona shahar Kirgili mavzesi hududidan o‘tgan 4R-140A “Farg‘ona shahriga” avtomobil yo‘lining 8-kilometrida sodir bo‘lgan. 2005-yilda tug‘ilgan haydovchi T.A. Spark’ni boshqarib ketayotib, keskin tormoz bosib yuborishi natijasida boshqaruvni yo‘qotgan va yo‘l chetidagi beton simyog‘ochga urilgan.
Natijada Spark yo‘lovchilari — 2005-yilda tug‘ilgan Q.M., Y.A., 2004-yilda tug‘ilgan E.SH., va N.F.lar tan jarohati olib, shifoxonaga yotqizilgan. Ko‘rsatilgan tibbiy muolajalarga qaramasdan, avtomobilda bo‘lgan ikki yo‘lovchi Q.M. va Y.A.lar shifoxonada vafot etgan.
O‘zbekistonda 2023-yilda transport vositasini boshqarish huquqidan mahrum qilinganiga qaramay, qaytadan rulga o‘tirgan shaxslar 707 ta YTH sodir etgan. Buning oqibatda 212 nafar shaxs vafot etgan, 546 nafari esa turli darajadagi tan jarohatlari olgan.
Haydovchilik guvohnomasidan mahrum qilinganlar umumiy haydovchilar sonining 0,3 foizini tashkil qilgani holda, ular tomonidan sodir etilgan yo‘l-transport hodisalari jami yuz bergan avariyalarning 11 foizini tashkil etgan.
2024-yilning birinchi yarmida O‘zbekiston bo‘yicha qonuniy ravishda o‘qib, haydovchilik guvohnomasiga ega bo‘lgan shaxslar tomonidan 10 million 200 mingdan ortiq qoidabuzarlik sodir etilgan.
Qayd etilishicha, bu davrda YTHning 58,5 foizi piyodalar ishtirokida sodir etilgan. Piyodalar ishtirokidagi hodisalarning 20 foizi piyodalar o‘tish joylari tashkil etilmagani oqibatida, 19 foizi esa piyodalar o‘tish joyi mavjud bo‘lsa-da, piyodalar tomonidan ongli ravishda yo‘l harakati qoidalariga bo‘ysunmasdan yo‘lning belgilanmagan joyidan kesib o‘tishlari oqibatida sodir bo‘lgan.
Izoh (0)