Dunyo o‘tkinchi, o‘lim esa haq. Xoh shoh bo‘lsin, xoh gado, ajal hech kimni ayab o‘tirmaydi. Minglab muxlislarga ega san’atkorlarining ko‘pchiligi ijodi eng gullagan, hayotga hali to‘ymagan vaqtda vafot etgan. O‘zbek san’ati va madaniyati, estrada va shou-biznesidagi ana shunday taqdir egalarining o‘limiga nima sabab bo‘lganini xotirlaymiz.
Ajal mashhurlarni ham chetlab o‘tmaydi
Aktyor Otabek G‘aniyev 1985-yil 1-avgust sanasida 33 yoshida olamdan o‘tgan.
Maftunkor xonanda Rayhon G‘aniyevaning otasi, marhuma Tamara Shokirovaning turmush o‘rtog‘i, afsonaviy san’atkor Nabi G‘aniyevning nabirasi marhum aktyor Otabek G‘aniyev o‘z davrining eng mashhur san’at vakillaridan edi. Rejissyor Nabi G‘aniyevning to‘rt farzandi bo‘lib, ularning birortasi san’atkor bo‘lishni istamagan. Faqatgina o‘g‘li Hotamning farzandi Otabek G‘aniyev bobosining kasbini davom ettiradi.
Otabek G‘aniyev 1977-yili aktrisa Tamara Shokirova bilan oila quradi. Ikki ijodkorning muhabbatidan qo‘ng‘iroq sochli qizaloq Rayhon dunyoga keladi. Avvaliga hammasi yaxshi edi. Otabek G‘aniyev eng yaxshi rollarni ijro etayotgan paytda baxtsiz hodisaga uchrab, vafot etadi. O‘shanda Rayhon G‘aniyeva 6 yoshli qizaloq edi.
O‘xshamagan turmush va bevaqt o‘lim
Aktyor Zokir Mo‘minov 2000-yil 38 yoshida olamdan o‘tgan.
“Qish sonatasi”dagi Yujin va “Saroy javohiri”dagi Tangemni o‘zbekcha gapirtirgan aktrisa Zulxumor Mo‘minova Moskvada o‘qib yurgan kezlari kursdoshi Zokir Mo‘minov bilan bir-biriga ko‘ngil qo‘yishadi. 4-bosqichda tahsil olayotgan ikki talaba ham Toshkentda, ham Rossiyada to‘y qilishadi. Moskvadagi yotoqxonada o‘tgan to‘yda katta qozonda osh pishiriladi. 1985-yilda ular o‘g‘il farzand ko‘rishadi va Umid deb ism qo‘yishadi.
— Aktyor bilan aktyor yashab ketishi qiyin. Sababi har bitta aktyor o‘ziga xos olam. Hech kim hech qachon o‘z olamidan voz kechib, boshqa birovning olamida yashab keta olmaydi. Chunki o‘z olamidan voz kechish, ishidan voz kechish degani. Ikki san’atkorning bitta oilada munosib tarzda, o‘zini asrab qolgan holda, o‘z dunyosini saqlagan holda yashab ketishi juda katta mardlikni talab qiladi. Biz Zokir bilan ko‘p yashamadik, afsuski. Shuning uchun bu davrlardan o‘ta olarmidik, yo‘qmi, bilmayman. Zokir ham kasbini juda yaxshi ko‘rardi. Birga yashaganimizda nima bo‘lardi, buni bilish menga endi qorong‘i, deydi Zulxumor Mo‘minova.
Oxunjon Madaliyev giyohvand moddalar qurbonimi?
Xonanda Oxunjon Madaliyev 2000-yilning 29-iyun sanasida 37 yoshida vafot etgan.
Oxunjon Madaliyevning vafoti haqida odamlar orasida ko‘plab mish-mishlar yuradi. Kimdir uni narkotik modda iste’mol qilib vafot etgan desa, boshqa birov suiqasd qurboni bo‘lgan deydi.
— Men o‘sha kunlari Oxunjon akamga haydovchi edim, Tico’da yurardim. To‘y tugagach, Oxun akamni akalari olib ketgandi. To‘y chiroyli o‘tgach, yo‘lga chiqdik. Oxun akam to‘ydan charchagan, doim uzoq yo‘lda uxlab ketar edi. Farg‘onadagi “Girgili” da Anvar aka hovlisiga yetib borib, Oxun akamni uyg‘otishga urindim, lekin u turmayapti. Qo‘rqib, tez yordamga murojaat qildik. Doktor Oxun akamni 40 daqiqa oldin vafot etganini aytdi. Biz bunga ishonmay, shok holatida qoldik. Ba’zi odamlar narkotik qabul qilgani haqida gapirgandi, lekin Oxun akam hech qachon bunday moddalar iste’mol qilmagan edi. Bu holat odamlar tomonidan turlicha talqin qilindi, deydi Oxunjon Madaliyevning haydovchisi Po‘latjon Omonov.
Xonanda aslida yurak xurujidan vafot etgan.
Ajal qiziqchini sahnada olib ketgan
Aktyor va qiziqchi Sobit Asomov 1996-yil 27-mart sanasida 37 yoshida olamdan o‘tgan.
O‘zbekistonda xizmat ko‘rsatgan artist Obid Asomovning akasi taniqli so‘z ustasi Sobit Asomov 1996-yilda sahnada rol ijro etayotib vafot etgan.
Aka-uka Sobit va Obid Asomovlar, To‘xtamurod Azizov, Botirxo‘ja Muhammadxo‘jayev hamda Mirzabek Xolmedov birgalikda “Ko‘zgu” teatrini tashkil qilishgan edi.
42 joyidan pichoqlangan: qotil hamkasblarining qurboni bo‘lgan Laylo
Xonanda Laylo Aliyeva 1998-yil 1-may kuni 23 yoshida mashhur hamkasblari qotilligining qurboni bo‘lgan.
1990-yillarning o‘zbek tinglovchilari uchun megayulduz hisoblangan Laylo Aliyeva ikki yasharligidan san’atning moda yo‘nalishiga kirib kelgan. O‘n yoshida go‘zallik tanlovlarida g‘olib bo‘lgan. Qo‘shiq kuylab, kliplarda ko‘rinish berib, omma e’tiboriga tushgan hamda minglab muxlislar orttirgan. Bobosi zargar bo‘lgani tufayli Laylo ham bolaligidan tilla taqinchoqlarni yaxshi ko‘rgan. Layloning o‘ldirilishiga ham shu tillalar sabab bo‘lgan. O‘sha vaqtlarda mashhur bo‘lgan “Al-Vakil” guruhidagi ikki qo‘shiqchi yigit 1998-yilning 1-mayida Layloning uyiga go‘yo mehmon bo‘lib kelgan. Laylo ularni tanigani uchun yarim tun bo‘lishiga qaramay uyiga kiritgan. Biroz suhbatlashib o‘tirgach, yigitlar Layloga hujum qilgan va 42 joyidan vahshiylarcha pichoqlab tashlashgan. Qotillar uning barcha tilla taqinchoqlarini, hatto barmog‘idan chiqishi qiyin bo‘lgan uzugini sovun surkab sug‘urib olishgan.
Qotillar qo‘lga olinib, qamoq jazosiga hukm qilingan. Layloni dafn etishgach, og‘ir musibatni ko‘tarolmay, otasi ham bir oydan keyin vafot etgan. Laylo Aliyevadan yolg‘iz o‘g‘li Jasurbek yodgor bo‘lib qolgan.
Besh yil ichida er-xotinning ketma-ket vafoti
Aktyor Alisher Hamroyev 2005-yil may oyida 29 yoshida olamdan ko‘z yumgan.
O‘rta yosh vakillari aktyor Alisher Hamroyevni yaxshi taniydi. Aktyor “Dilxiroj”, “Notanish polvon”, “Marjona”, “Yodgor” kabi filmlardagi rollari bilan muxlislar e’tiboriga tushgan.
— Aslida kuyovimiz 2004-yilda kasal bo‘lgan va 2005-yilda oyog‘idan saratonga chalinganligi sababli vafot etgan. Singlim esa bu holatdan stressga tushib qolgan, oradan uch yil o‘tib u ham vafot etdi. Ikki nafar farzandi bilan Toshkentga kelgandi, juda qiynalgan, ulardan hech kim xabar ham olmagan. Vaqt o‘tib oqqon kasalligiga chalingan, keyin yana bolalarini olib Buxoroga ketgan.
Yana qaytib Toshkentga olib kelganimizdan keyin 10 kun davolanib shu yerda vafot etdi. Bolalari Buxoroda edi, dadamning uyiga olib borib o‘sha yerdan chiqarganmiz. Singlim onkologiya kasalliklari shifoxonasida yotganida Alisherni tushimda ko‘rdim, u menga seni qiynalishingni xohlamayman, o‘zim bilan olib ketaman, deb aytdi. Biz hayron qoldik, singlim bilan uyga borib “is” chiqardik. Unga hammasi yaxshi bo‘ladi, tushga nimalar kirmaydi, dedik. Biroq oradan 10 kun o‘tib vafot etdi, deydi aktyorning qaynopasi Guloyim Mahmudova.
Rejissyor qotili bo‘lgan mardikor yigitlar
Aktyor va rejissyor, Skan-Multi taxallusi bilan ijod qilgan Iskandar A’zamov 2006-yil 23-iyunda 28 yoshida suiqasd qurboni bo‘lgan
O‘n bir yillik ijodi davomida yuzlab musiqiy videokliplarni suratga olgan Iskandar A’zamov o‘z uyida ikki nafar yigit tomonidan shafqatsizlarcha pichoqlab o‘ldirilgan. Uning xizmatini qilib yurgan mardikor yigitlar uning orqasiga va yuragiga bir necha marta pichoq urgan. Qotillarning san’atkorni o‘ldirishdan maqsadi pul bo‘lgan — ular rejissyorning uyida pul ko‘p bo‘ladi deb o‘ylagan. Ammo bunday bo‘lib chiqmagan. Jinoyatchilar ushlanib, ularga qilmishiga yarasha jazo tayinlangan.
30 ga kirmay vafot etgan suxandon
Suxandon va xonanda Dildora Qayumova 2008-yilda 28 yoshida olamdan o‘tgan
Ustazoda ijodkor taniqli televideniye rejissyori Zokir Qayumov va O‘zbekiston xalq artisti Malika Qayumovaning farzandi Dildora Qayumova karyerasini 1998-yillarda televideniyeda boshlagan. “Unutmoq osonmas”, “Musiqiy tanaffus”, “Yangi yilda yangi qo‘shiqlar” kabi bir qancha loyihalardagi chiqishlari bilan tanilgan. Qo‘shiqchilik faoliyatida ham bir qancha taronalari bilan o‘z muxlislarini topgan Dildora Qayumova 28 yoshida vafot etgan. Uning bir nafar o‘g‘il farzandi bor.
Mudhish avtohalokat qurboni bo‘lgan Mo‘min
“Bojalar” guruhi a’zosi xonanda Mo‘min Oripov 2009-yilning 28-iyulida avtohalokat oqibatida 25 yoshida vafot etgan.
“Jiyda gullaganda”, “Boyvachcha”, “Anhor bo‘yida”, “Eslama meni” kabi qo‘shiqlari bilan yoshlar orasida shuhrat qozongan “Bojalar” guruhi a’zosi Mo‘min Oripov ham hayotdan erta ko‘z yumgan. 2009-yilning 28-iyunidan 29-iyuniga o‘tar kechasi Surxondaryo viloyatining Angor tumanida, “Bojalar” guruhi yigitlari gastroldan qaytayotgan vaqtda mudhish avtohalokat yuz bergan.
—Tojikistonga konsert qo‘yishga borganmiz, Dushanbeda va Regarda konsertdan so‘ng Surxondaryoga yo‘l olganmiz. Yo‘lda charchab, Angorda uxlab qolganmiz va shu yerda avtohalokat bo‘lgan. Yelkam sinib, o‘pkamni teshib, umurtqamning pastki qismi ham shikastlangan. Halokatdan keyin bir necha marta operatsiya qilindim — Termizda o‘pkamga lazer jarrohlik, Toshkentda esa yelka va umurtqa operatsiyasi o‘tkazildi. Hali ham davolanib turaman.
Bu voqea haqida eslashni xohlamayman. Mo‘min mening haqiqiy do‘stim edi, u bilan shou-biznesdan oldin ham birga ishlardik. Shifoxonada, voqeadan 20 kun o‘tib, Mo‘minning vafot etganini bilganman. O‘sha paytda endi operatsiyadan chiqqanim, siqilish mumkin emasligi sababli mendan yashirishgan. Bu xabarni menga Dilmurod aka (Doktor D) aytgan. Mo‘minni yo‘qotganimni eslash juda og‘ir, deya xotirlaydi Javlon Shodmonov.
Mo‘min Oripovning Kamola ismli ayoli va bir o‘g‘li bor. Jahongir Poziljonov do‘stining xotirasiga o‘g‘lining ismini Mo‘min deb qo‘ygan. Xonanda hayot bo‘lganida bu yil 41 yoshni qarshilagan bo‘lar edi.
Kontrabandachilar sabab halok bo‘lgan reper
Radius 21 taxallusi bilan tanilgan xonanda Shahzod G‘ulomov 2010-yilning 11-sentyabrida 29 yoshida olamdan o‘tgan.
Bolaligidan san’atga qiziqqan Shahzod san’at oliygohining ommaviy bayramlar rejissyorligi yo‘nalishida o‘qigan. O‘qishni tamomlagach, televideniyedagi Radius 21 nomli mualliflik ko‘rsatuvi tomoshabinlar e’tiboriga tushadi. Keyinroq qo‘shiq kuylashga bo‘lgan muhabbati uni xonandalikka yetaklaydi va Shahzod G‘ulomov rep yo‘nalishida kuylay boshlaydi. Reperning deyarli barcha qo‘shiqlari ommalashib ketadi, hatto hozirgi kunga qadar o‘z tinglovchilariga ega.
2010-yilning 12-sentyabrida xonanda Piskent shahri postiga yaqin joyda Matiz rusumli mashinasida oilasi bilan ketayotgan bo‘lgan. Ularga qarama-qarshi yo‘nalishdan esa kontrabanda mahsulotlarini postdan olib qochayotganlar kelib urilgan. Shahzod G‘ulomov avtohalokat bo‘lgan vaqtda, voqea joyining o‘zida olamdan o‘tgan, uch yarim oylik farzandi Beksulton ertasi kuni vafot etgan. Beksulton xonandaning yolg‘iz farzandi edi.
Qandli diabetga qarshi kurashgan komik
Komik aktyor Shuhrat Nuraliyev 2017-yil 22-noyabr sanasida 37 yoshida vafot etgan.
Shuhrat Nuraliyev O‘zbek milliy drama teatri va kinodagi qator rollari bilan tanilgan. “Osmondagi bolalar”, “Devona”, “Ulfatlar-2”, “Yangi boy”, “Sevginator-2”, “Zarb” filmlaridagi rollari uni yanada mashhur qilgan. Qandli diabet kasalligidan aziyat chekib kelayotgan san’atkor chuqur koma holatiga tushib qolgan va Endokrinologiya institutida hayot uchun kurashgan. Ammo 2017-yilning kuzida aktyor bu yorug‘ olamdan ko‘z yumgan.
“Xalqaro xotin-qizlar kuni”da vafot etgan aktrisa
Aktrisa Hilola Toshmuhammedova 2018-yilning 8-martida 32 yoshida dunyodan ko‘z yumgan.
Aktrisa 7-mart kuni ishdan uyga qaytgach tobi qochgan, shifoxonada esa qon bosimi keskin tushib ketgan. Oqibatda 8-mart sanasida vafot etgan. Hilola Toshmuhammedova “Faridaning dil daftari”, “Ko‘ngil” kabi spektakllar, bir qator film va seriallarda rollar ijro etgandi.
Piyodalar yo‘lakchasidagi avtohalokat
Aktrisa Farangiz Rejametova 2018-yil 20-iyulda avtohalokat oqibatida 25 yoshida halok bo‘lgan.
“Oyijon” filmidagi bosh roli bilan tanilgan aktrisa, Fotima Rejametovaning qizi Farangiz Rejametova san’atkorlar oilasida dunyoga kelgan. O‘zbekiston Davlat jahon tillari universiteti “Xalqaro jurnalistika” fakulteti bitiruvchisi bo‘lgan 25 yoshli aktrisani 2018-yil 20 iyul kuni soat 21:15 atrofida Abdulla Qodiriy va Mahatma Gandi chorrahasidagi piyodalar o‘tish joyida Mercedes-Benz mashinasi urib ketgan. Haydovchi Farangizni kasalxonaga olib borgan, ammo aktrisa yo‘lda olamdan o‘tgan.
Nomus himoyasi: harakatlanayotgan yuk mashinasidan tushib ketgan
Aktrisa Gavhar Sharipova 2019-yilning 19-noyabrida 39 yoshida olamdan o‘tgan.
2019-yilning 18-noyabrdan 19-noyabrga o‘tar kechasi soat 02:20 larda, G‘uzor tumani yo‘lida Isuzu yuk avtomobili haydovchisi yo‘lovchi sifatida ketayotgan Gavhar Sharipovaga shilqimlik qilgan. Bir qo‘li rulda bo‘lib, o‘ng qo‘li bilan aktrisaning yelka va qo‘llarini ushlagan. Aktrisa avtomobil eshigini ochib, uni ushlab turgan. Haydovchi buni ko‘ra turib harakatlanishda davom etgan. Oqibatda o‘zini himoya qilishga uringan Gavhar Sharipova avtomobil kabinasidan tushib ketib, hodisa sodir bo‘lgan joyda vafot etgan.
“Ummon” yulduzining oqqonga qarshi kurashi
Xonanda Jasur Rafiqov 2022-yilning 14-noyabrida saraton kasalligini boshdan kechirib, 31 yoshida olamdan o‘tgan.
— 2020-yili o‘g‘limning peshonasida shish paydo bo‘ldi. Shifokorlar uni “jirovik” deb xato tashxis qo‘ydilar, lekin keyin shahar onkologiyasiga tekshiruvga olib borilganda, o‘g‘limning holati jiddiy ekanligi ma’lum bo‘ldi. Shifokorlar tahlillarni Hindistonga yuborishni tavsiya qildilar, ammo o‘g‘limning ahvoli yomonlashdi. Keyin ukamning yordamida Respublika onkologiyasida boshqa bir shifokor ko‘rdi va tomog‘ida shish borligini aniqladi. Shundan so‘ng operatsiya qilindi. O‘g‘lim kimyo terapiya olishni boshladi, lekin ba’zi shifokorlar uning holatini yengillashtira olishmasdi. O‘g‘limning kasalligi suyaklarga tarqaldi, ammo u hamisha Allohga tayanib, sinovga sabr bilan qaradi. To‘rtinchi kimyo terapiyadan so‘ng uning ahvoli yaxshilandi-yu, ammo xushsurat bo‘lib, Allohning nomini aytib vafot etdi.
“Ona, bir kun o‘lsam narigi dunyoga qo‘shiqlarim bilan bormayman-ku”, degan gapi haligacha quloqlarim ostida jaranglaydi. Kichik bizneslarni yo‘lga qo‘yib tirikchilik qilib yurdi, deydi Noila Rafiqova.
Burun operatsiyasidan omon chiqmagan bloger
Bloger Farhod Mannopov 2023-yil 5-mart kuni 27 yoshida olamdan o‘tgan.
“Mittivine” kulgi jamoasi asoschisi vayner Farhod Mannopovning o‘limi uning muxlislari qalbini larzaga keltirdi. U endigina 27 yoshni qarshilagan edi. U xususiy klinikalardan biriga burun shaklining qiyshayishi va olgan jarohati sabab murojaat qilgan. Operatsiya paytida noto‘g‘ri qilingan narkoz oqibatida uning yuragi urishdan to‘xtagan.
Farhod Mannopov otasiz, kamtarona oilada ulg‘ayganini yashirmasdi. U vaynerlik faoliyatini boshlashdan avval o‘qish bilan birga ofitsiantlik ham qilgan. 2020-yili yaqin do‘sti Ulug‘bek Shodibekov bilan hamkorlikda vaynerlik faoliyatini boshlagandi.
Qattiq shamollash klipmeykerni o‘limga olib kelgan
Klipmeyker Jasur Shametov 2024-yilning 10-fevral sanasida 39 yoshida vafot etgan.
Jasur Shametov o‘zbek estradasining eng mashhur xonandalari bilan hamkorlikda ishlardi. Ijtimoiy tarmoqlarda mashhur klipmeykerning o‘limi bilan bog‘liq turli mish-mishlar tarqaldi. Ular orasida hatto Jasur Shametov o‘z joniga qasd qilgani bilan bog‘liq xabarlar ham bor edi.
— Akamni o‘lik holda birinchi men ko‘rdim. Juda ko‘p gap-so‘zlar tarqaldi, menda o‘lim holati yuzasidan ekspertlarning xulosasi ham bor. Avvalo hammasi Allohning irodasi. Akam ikkimizning uyimiz juda yaqin, bir hafta oldin onamning oldiga kelib qon bosimi oshayotgani haqida aytib qoldi. Oxirgi ikki kunda esa qattiq shamollagandi. 9-fevral kuni kechasi 20:30 da qo‘ng‘iroqlarga javob bermagach, derazadan oshib uyga kirdim. O‘shanda akamni jonsiz holatda ko‘rib, shokka tushdim. Ekspertlar akamga pnevmoniya tashxisini qo‘ydi, deydi klipmeykerning ukasi Javlon Shametov.
19 bahorida vafot etgan Shirin
Xonanda Shirin Abdullayeva 2025-yil 15-fevral kuni 19 yoshida bu yorug‘ dunyoni tark etdi.
Xonanda Shirin Abdullayeva shu yilning 15-fevralida 19 yoshida olamdan o‘tdi. Uning vafoti sabablari oila a’zolari tomonidan ochiq-oydin aytilmagan bo‘lsa-da, u katta ehtimol bilan meningit xastaligi bilan kurashib kelgan.
Shirin 2005-yil 14-dekabr sanasida Namangan shahrida dunyoga kelgan. Pekindagi Sinxua universiteti talabasi bo‘lgan qo‘shiqchi 2023-yilda san’at yo‘nalishi bo‘yicha Zulfiya nomidagi davlat mukofoti bilan taqdirlangan.
Shirin uch yoshga to‘lar-to‘lmas qo‘shiq kuylashni boshlagan, o‘zi qo‘shiq yozardi, respublika va xalqaro musiqiy tanlovlarda qatnashardi ham kinoda suratga tushardi. Shirinning azaliy orzusi o‘zining jonajon vatani O‘zbekistonning nomini xalqaro maydonda dong taratish ekanini aytgandi.
U namanganlik yirik tadbirkorlardan biri Bahodir Abdullayevning besh nafar qiz farzandining kenjasi edi.
Izoh (0)