Navoiy viloyati Nurota tumani hududida sodir bo‘lgan yo‘l-transport hodisasi oqibatida 6 kishi halok bo‘ldi.
Qayd etilishicha, 9-iyun kuni soat 15:00 lar atrofida Nurota tumaniga kiraverishdagi “Dehibaland” qishlog‘i hududidan o‘tgan Navbahor—Nurota yo‘lida harakatlanib borayotgan Gentra rusumli transport vositasi haydovchisi o‘zi bilan bir yo‘nalishda ketayotgan Damas mashinasini quvib o‘tmoqchi bo‘lgan vaqtida qarama-qarshi tomondan kelayotgan Onix bilan to‘qnashgan.
“Xalq so‘zi”ning viloyat IIB Yo‘l harakati xavfsizligi boshqarmasidagi manbasiga ko‘ra, hodisa oqibatida Onix mashinasi salonida bo‘lgan bir oilaning 5 nafar aʼzosi: 36 yoshli erkak, uning 58 yoshli onasi, turmush o‘rtog‘i, 2 yoshli o‘g‘li hamda 2 oylik qizi, shuningdek, Gentra haydovchisi bo‘lgan erkak halok bo‘lgan.
Ta’kidlanishicha, YTH qurbonlarining ikki nafari voqea joyida, 4 nafari esa shifoxonada vafot etgan. Hozirda holat yuzasidan dastlabki surishtiruv ishlari olib borilmoqda.
Avvalroq Andijon viloyatida haydovchilik guvohnomasiga ega bo‘lmagan yigit mashina boshqarib, avtohalokat sodir etgani, Toshkent viloyatida boshqaruvni yo‘qotgan Damas transport vositasi kanalga tushib ketgani to‘g‘risida xabar berilgandi.
Izoh (0)