Toshkentning Shayxontohur tumani JQB xodimlari tomonidan katta miqdordagi giyohvandlik moddalarini “zakladka” yo‘li bilan tarqatgan shaxs ushlandi. Bu haqda poytaxt IIBB matbuot xizmati xabar berdi.
Toshkent viloyatining Chirchiq shahrida vaqtincha yashovchi fuqaroning xonadoni xolislar ishtirokida ko‘zdan kechirildi. Tezkor tadbir davomida xonadonning oshxonasida bekitib qo‘yilgan 37 dona politilen paketga qadoqlangan kukunsimon modda, elektron tarozi va boshqa qadoqlash uchun zarur vositalar aniqlanib, xolislar ishtirokida rasmiylashtirildi.
“Ishim yo‘qligi uchun Telegram’ga kirib ish qidirdim. Guruh chiqib qoldi. O‘sha yerga kirib yozsam, ish taklif qilishdi. Kuryerlikni aytishdi, yaxshi pul to‘laymiz, deyishdi. Ishga kirdim. Yakkasaroy tumanida politilen paketni Toshkentning chekkalariga yoyib chiqishni so‘rashdi. Shuni qildim. Mirzo Ulug‘bek tumanidan qora paketni olib, Yashnobod tumaniga berishni so‘rashdi. Ichida o‘nta edi. Uni uyimga olib bordim, tarozi sotib oldim. Ularni 1 grammdan qadoqlab chiqdim. Ko‘chaga chiqib, yana olmoqchi bo‘lganimda men ichki ishlar xodimlari ushlashdi”, deydi gumonlanuvchi shaxs.
Sud kimyoviy ekspertiza xulosasiga ko‘ra, gumonlanuvchidan olingan 337 o‘ramdagi moddalar sintetik va giyohvandlik vositalari ekani aniqlandi.
Holat yuzasidan U. ismli shaxsga nisbatan Jinoyat kodeksining 273-moddasi 5-qismi (giyohvandlik vositalari, ularning analoglari yoki psixotrop moddalarni ko‘p miqdorda qonunga xilof ravishda sotish) bilan jinoyat ishi qo‘zg‘atilgan. Unga nisbatan qamoqqa olish ehtiyot chorasi qo‘llanilib, dastlabki tergov harakatlari olib borilmoqda.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek—qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Aprel oyi oxirida Toshkent viloyatida narkokuryerlik bilan shug‘ullangan kollej talabasi ushlangandi.
Oktyabr oyining 10 kuni davomida giyohvandlik vositalarini yashirish yo‘li bilan (“zakladka”) tarqatgan va shunday noqonuniy faoliyat bilan shug‘ullangan 32 nafar shaxs ushlangan.
Izoh (0)