Тошкентнинг Шайхонтоҳур тумани ЖҚБ ходимлари томонидан катта миқдордаги гиёҳвандлик моддаларини “закладка” йўли билан тарқатган шахс ушланди. Бу ҳақда пойтахт ИИББ матбуот хизмати хабар берди.
Тошкент вилоятининг Чирчиқ шаҳрида вақтинча яшовчи фуқаронинг хонадони холислар иштирокида кўздан кечирилди. Тезкор тадбир давомида хонадоннинг ошхонасида бекитиб қўйилган 37 дона политилен пакетга қадоқланган кукунсимон модда, электрон тарози ва бошқа қадоқлаш учун зарур воситалар аниқланиб, холислар иштирокида расмийлаштирилди.
“Ишим йўқлиги учун Telegram’га кириб иш қидирдим. Гуруҳ чиқиб қолди. Ўша ерга кириб ёзсам, иш таклиф қилишди. Курерликни айтишди, яхши пул тўлаймиз, дейишди. Ишга кирдим. Яккасарой туманида политилен пакетни Тошкентнинг чеккаларига ёйиб чиқишни сўрашди. Шуни қилдим. Мирзо Улуғбек туманидан қора пакетни олиб, Яшнобод туманига беришни сўрашди. Ичида ўнта эди. Уни уйимга олиб бордим, тарози сотиб олдим. Уларни 1 граммдан қадоқлаб чиқдим. Кўчага чиқиб, яна олмоқчи бўлганимда мен ички ишлар ходимлари ушлашди”, дейди гумонланувчи шахс.
Суд кимёвий экспертиза хулосасига кўра, гумонланувчидан олинган 337 ўрамдаги моддалар синтетик ва гиёҳвандлик воситалари экани аниқланди.
Ҳолат юзасидан У. исмли шахсга нисбатан Жиноят кодексининг 273-моддаси 5-қисми (гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотиш) билан жиноят иши қўзғатилган. Унга нисбатан қамоққа олиш эҳтиёт чораси қўлланилиб, дастлабки тергов ҳаракатлари олиб борилмоқда.
Гиёҳванд моддалар савдоси
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек—қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Апрель ойи охирида Тошкент вилоятида наркокурерлик билан шуғулланган коллеж талабаси ушланганди.
Октябрь ойининг 10 куни давомида гиёҳвандлик воситаларини яшириш йўли билан (“закладка”) тарқатган ва шундай ноқонуний фаолият билан шуғулланган 32 нафар шахс ушланган.
Изоҳ (0)