Toshkent viloyatining Ohangaron shahrida YPX inspektori tomonidan to‘xtatilgan avtomashinada giyohvand moddasi borligi aniqlandi. Bu haqda viloyat YHXB xabar berdi.
Maʼlum qilinishicha, YPX inspektori tomonidan svetoforning taqiqlovchi ishorasiga amal qilmasdan harakatlangan haydovchi, 1984-yilda tug‘ilgan R.U boshqaruvidagi Tracker to‘xtatilib tekshirildi.
Fuqaro R.U. haydovchilik guvohnomasidan mahrum etilganligi maʼlum bo‘ldi. Shundan so‘ng haydovchi va avtomashina xolislar ishtirokida ko‘zdan kechirilganda haydovchining oldida rangsiz selofanga o‘ralgan, o‘tkir hidli, yashil rangli nasha giyohvand vositasiga o‘xshash modda borligi aniqlandi.
Dastlabki surishtiruvlarga ko‘ra, ushbu moddaning sof og‘irligi 47,26 grammni tashkil etgan.
Fuqaro va ashyoviy dalillar shahar IIBga topshirildi.
“Qoradori-2025” tadbiri haqida
Bu DXX va IIV tomonidan tashkil etilgan keng qamrovli tezkor-profilaktik tadbir bo‘lib, mamlakat bo‘ylab giyohvandlik vositalarining noqonuniy muomalasiga qarshi kurashishga qaratilgan. Tadbirning asosiy maqsadi giyohvand moddalar va kuchli ta’sir qiluvchi dorilarni noqonuniy tarqatish, saqlash va yetishtirish bilan shug‘ullanayotgan shaxslar va guruhlarni aniqlash, ularning faoliyatiga chek qo‘yishdir.
2025-yil 3–4-fevral kunlari o‘tkazilgan dastlabki bosqichda respublika bo‘ylab 653 ta maxsus tadbir o‘tkazildi. Ular davomida jami 112 kilo 257 gramm giyohvandlik vositalari (geroin, opiy, gashish, sintetik moddalar) va 8 601 dona kuchli ta’sir qiluvchi dorilar musodara qilindi.
Izoh (0)