Qozog‘istondan olib kelingan sintetik giyohvandlik vositalari aylanmasiga chek qo‘yildi.
Qozog‘istondan O‘zbekistonga Toshkent viloyatidagi “Navoiy” chegara bojxona posti orqali kirib kelgan Andijon viloyatining Qo‘rg‘ontepa tumanida yashovchi, 1983 va 1988-yillarda tug‘ilgan 2 nafar fuqaroga tegishli tibbiy uskunalar ko‘zdan kechirildi.
Natijada ushbu uskunalar ichiga yashirilgan, umumiy bahosi 1 million dollarga teng bo‘lgan 4,206 kg “Mefedron” hamda 3,970 kg “Alfa-PVP” sintetik giyohvandlik vositalari borligi aniqlandi.
Shuningdek, tezkor tadbir davom ettirilib, mazkur ishga aloqador bo‘lgan Toshkent shahri va viloyatida yashovchi, 1992, 1993, 1995 hamda 2000-yillarda tug‘ilgan 5 nafar fuqaro ham qo‘lga olindi.
Maʼlum bo‘lishicha, ular Telegram orqali narkotik moddalar savdosi bilan shug‘ullanuvchi Rossiya fuqarosi ko‘rsatmalarini bajarib kelgan.
“Navoiy” chegara bojxona postida fosh etilgan boshqa holatda esa, 1980-y.t. Qirg‘iziston fuqarosi tomonidan aravakash sifatida yollangan shaxs Qozog‘istondan O‘zbekistonga gaz plitasini olib kirgan vaqtida to‘xtatilib tekshirildi.
Natijada gaz plitasi ichida 1,985 kg “Alfa-PVP” sintetik narkotik moddasi borligi aniqlanib, protsessual tartibda rasmiylashtirib olindi.
Shuningdek, tezkor tadbir davom ettirilib, ushbu giyohvandlik vositasini qabul qilib olgan vaqtida Toshkent shahrida yashovchi, 2006-y.t. shaxs ashyoviy dalillar bilan ushlandi.
Hozirda har ikki holat yuzasidan mazkur shaxslarga nisbatan Jinoyat kodeksining 246 (kontrabanda) va 273-moddalari (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) bilan jinoyat ishlari qo‘zg‘atilib, tergov harakatlari olib borilmoqda.
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi. May oyining boshlarida Sirdaryo, Namangan va Andijon viloyatlarida qariyb 88 kilogramm giyohvandlik moddalarni olayotgan shaxslar ushlangandi.
Izoh (0)