O‘zbekistonga Tojikistondan kontrabanda yo‘li bilan 26 kilodan ortiq giyohvandlik vositalari olib kelingani aniqlandi.
Davlat xavfsizlik xizmatining Chegara qo‘shinlari harbiy xizmatchilari tomonidan xizmatning Toshkent viloyati bo‘yicha boshqarmasi hamda bojxona idoralari bilan hamkorlikda o‘tkazilgan tezkor tadbirda, 1986-yilda tug‘ilgan Tojikiston fuqarosi o‘zbek-tojik davlat chegarasini qonunga xilof ravishda buzib o‘tgan vaqtida to‘xtatib qolingan.
Unga tegishli sumka ko‘zdan kechirilganda, 15 dona o‘ramdagi jami 14 kilo 584 gramm gashish moddasi borligi aniqlanib, protsessual tartibda rasmiylashtirib olingan.
Shundan so‘ng, uni buyurtma qilgan shaxsni aniqlash yuzasidan tezkor tadbir davom ettirildi. Natijada Farg‘ona viloyatining Toshloq tumanida yashovchi, 1969-yilda tug‘ilgan shaxs Bekobod tumanida narkotik moddani qabul qilib olgan vaqtida ashyoviy dalillar bilan ushlangan.
Boshqa holatda esa, xizmatning Farg‘ona viloyati bo‘yicha boshqarmasi xodimlari tomonidan ichki ishlar hamda bojxona organlari bilan hamkorlikda o‘tkazilgan tezkor tadbirda Toshkent viloyatining Bekobod tumanida yashovchi, 1992-yilda tug‘ilgan shaxs qo‘shni davlatdan kontrabanda yo‘li bilan olib kelingan 9 kilo 467 gramm opiy moddasini sotgan vaqtida ashyoviy dalillar bilan qo‘lga olingan.
Tergovga qadar tekshiruv davomida tojikistonlik narkokuryer tomonidan Surxondaryo viloyati hududiga kontrabanda yo‘li bilan yetkazib berilgan narkotik moddani Denov tumanida yashovchi, 1994-yilda tug‘ilgan fuqaro qabul qilib olib, Toshkent viloyatiga olib kelgani aniqlangan va u ham protsessual tartibda ushlangan.
Qo‘qon shahrida qayd etilgan holatda, Farg‘ona—Qo‘qon yo‘nalishida harakatlanayotgan Lacetti to‘xtatilib, xolislar ishtirokida ko‘zdan kechirilganda Qo‘qon shahrida yashovchi, 1967-yilda tug‘ilgan yo‘lovchi o‘zining bel qismiga 1 kilo 759 gramm gashish yashirib olgani aniqlangan.
Farg‘ona shahrida kuzatilgan holatda esa, Farg‘ona—Toshloq yo‘nalishi bo‘ylab harakatlanayotgan, 1995-yilda tug‘ilgan shaxs boshqaruvidagi “Zaparojes” to‘xtatilib, xolislar ishtirokida ko‘zdan kechirilganda, uning salon qismida 995 gramm gashish borligi aniqlangan va tegishli tartibda rasmiylashtirib olingan.
O‘tkazilgan tezkor tadbirlar natijasida jami 26 kilo 805 gramm giyohvandlik vositalari ashyoviy dalil sifatida olingan. Ular Tojikistondan kontrabanda yo‘li bilan olib kelingan.
Hozirda ushbu shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi. May oyining boshlarida Sirdaryo, Namangan va Andijon viloyatlarida qariyb 88 kilogramm giyohvandlik moddalarni olayotgan shaxslar ushlangandi.
Izoh (0)