Toshkent viloyatida 15-apreldan 15-maygacha “Xavfsiz va sog‘lom yurt” shiori ostida keng qamrovli tezkor-profilaktik tadbirlar o‘tkazildi. Bu haqda viloyat IIBB matbuot xizmati xabar berdi.
Tadbirlar natijasida giyohvandlik moddalarining noqonuniy muomalasi bilan bog‘liq 243 ta holat aniqlandi. Tadbirlar davomida 39,3 kg giyohvandlik vositasi hamda 9 058 dona kuchli taʼsir qiluvchi dori vositasi muomaladan olindi.
Narkotik moddalarni targ‘ib qiluvchi 1 218 ta chizilgan graffiti yozuvi aniqlanib, o‘chirildi. Shuningdek, kuchli taʼsir qiluvchi dori va sintetik giyohvandlik vositalari “zakladka”si bilan shug‘ullangan 20 nafar shaxs ushlandi.
Shu bilan birga, 9 dona o‘q otar, 21 dona pnevmatik qurol va 283 dona o‘q-dorilar daliliy ashyo sifatida musodara qilindi. 1 546 ta holatda noqonuniy saqlanayotgan sovuq qurol aniqlanib, 1 600 ta o‘tkir tig‘li jism tegishli tartibda hujjatlashtirilib olindi.
Yo‘llarda 48 mingdan ziyod qoidabuzarlik holati qayd etildi, shundan 11 mingdan ortig‘i qo‘pol turdagi qoidabuzarlik hisoblanadi. 446 ta holatda haydovchilar mast holatda transport vositasini boshqargani, 2 800 ta holatda esa haydovchilar tegishli hujjatsiz transport vositasini boshqargani aniqlandi.
Qo‘riqlash xizmati bo‘yicha 2 723 ta obyekt, jumladan 2 371 ta xonadon va 352 ta ijtimoiy muassasa texnik qo‘riqlovga olindi. Shuningdek, tergov va sud organlaridan yashirinib yurgan 84 nafar qidiruvda bo‘lgan shaxs qo‘lga olinib, 45 nafar bedarak yo‘qolgan fuqaro topildi va oilalariga qaytarildi.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Aprel oyi oxirida Toshkent viloyatida narkokuryerlik bilan shug‘ullangan kollej talabasi ushlangandi.
Oktyabr oyining 10 kuni davomida giyohvandlik vositalarini yashirish yo‘li bilan (“zakladka”) tarqatgan va shunday noqonuniy faoliyat bilan shug‘ullangan 32 nafar shaxs ushlangan.
Izoh (0)