Telegram asoschisi Pavel Durov amerikalik jurnalist Taker Karlsonga intervyu berdi. Unda Durov birinchi marta 2024-yilda Fransiyada hibsga olingani haqida gapirgan. Bu haqda NUR Kazakhstan xabar berdi.
“Avvaliga biz go‘yoki yuridik so‘rovlarga javob bermaganimizni aytishdi, ammo bu yolg‘on. Shunday bo‘lgan taqdirda ham, “ishtirokchilik” tushunchasining talqini nihoyatda xato. Advokatlarning aytishicha, pretsedentlar deyarli yo‘q”, dedi Durov.
Uning so‘zlariga ko‘ra, Fransiyada u “bank hisobvaraqlarisiz, auditsiz” kabi da’volar bilan ayblangan. Ammo Telegram “mutlaqo boshqa daraja: milliard foydalanuvchi, audit, shaffoflik” deya qo‘shimcha qilgan. U Fransiya rasmiylarining “milliardlab Telegram foydalanuvchilari orasida noqonuniy faoliyat bilan shug‘ullanganlar borligi” haqidagi ayblovlarini bema’nilik deb hisoblaydi.
“Bu 350 million amerikalikdan biri jinoyat sodir etgani uchun Donald Trampni hibsga olishga yoki Makronni Tuluzadagi talonchilikda ayblab qamoqqa tiqishga o‘xshaydi. Bu o‘ta bema’nilik”, deydi Telegram asoschisi.
Uning so‘zlariga ko‘ra, hibsdaligiga qaramay, u o‘z qomatini saqlab qolishga va parhezga rioya qilishga muvaffaq bo‘lgan. Sport zali yo‘q bo‘lsa ham, u o‘z kamerasida jismoniy mashqlar bilan shug‘ullangan.
“Menga ovqatlanish masalasida istisno qilishganga o‘xshaydi. Hammasi joyida edi. Men go‘sht va fastfud yemayman. Menga baliq berishdi”, dedi Durov.
Pavel Durov 2024-yilning 24-avgust kuni Parijdagi Le Burje aeroportida qo‘lga olingandi. Unga qo‘yilgan ayblovlar bo‘yicha 20 yilgacha qamoq jazosiga hukm qilinishi mumkin. Hibsga olinganidan so‘ng, messenjer jamoasi bayonot berib, kompaniya bosh direktorning yashiradigan hech narsasi yo‘qligini bildirgan.
26-avgust kuni Parij prokuraturasi Durovga qarshi ish 8-iyul kuni ochilganini va unga 12 ta jinoyat bo‘yicha ayblov qo‘yilganini ma’lum qilgan. Ular orasida: hokimiyat organlari bilan hamkorlik qilishdan bosh tortish, voyaga yetmaganlarning pornografik tasvirlarini saqlash va tarqatishda ishtirok etish, giyohvandlik vositalarini olish, tashish, saqlash, sotish yoki o‘tkazishda ishtirok etish, uyushgan guruh tarkibida firibgarlikda ishtirok etish, kriptovalyuta vositalaridan foydalanish, kabilar mavjud.
Keyinchalik ma’lum bo‘lishicha, biznesmen katta garov evaziga qo‘yib yuborilgan, biroq Fransiyani tark etishi taqiqlangan. Fransiyalik jinoiy ishlar bo‘yicha advokat Devid Libeskindning fikricha, Durovning sudi 3-4 yilga cho‘zilish ehtimoli bor. Biroq Durov nazoratni yanada yumshatishni so‘rashi mumkin.
6-sentyabr kuni Durov Fransiyadagi aeroportda hibsga olinganidan keyin birinchi marta aloqaga chiqqan — o‘z kanalida post e’lon qilgan. Tadbirkor barchani qo‘llab-quvvatlagani va mehr-muhabbati uchun minnatdorlik bildirib, mavjud vaziyat bo‘yicha o‘z qarashlari bilan o‘rtoqlashgan.
Durov hibsdan ozod etilgach, Telegram moderatsiya siyosatini yangilagani ma’lum bo‘ldi: messenjer endi moderatorlarga chatlar va xususiy guruhlardagi “noqonuniy kontent” haqida xabardor bo‘lish imkonini beradi.
Keyinroq fransuz ommaviy axborot vositalari Telegram Pavel Durov hibsga olinganidan keyin Fransiya rasmiylarining qonuniy so‘rovlariga javob berishni boshlagani, politsiyaga bir nechta jinoiy ishlar bo‘yicha so‘rovlar bo‘yicha materiallar taqdim etgani haqida xabar bergan.
Izoh (0)