Kambag‘allikni qisqartirish va bandlik vazirligining Andijon shahar bo‘limi boshlig‘i ish vaqtida kabinetida psixotrop modda iste’mol qilgani haqida xabar berilgan edi. Holat yuzasidan qo‘shimcha ma’lumotlar berildi.
Unga ko‘ra, Andijon shahri Kambag‘allikni qisqartirish va bandlikka ko‘maklashish bo‘limi boshlig‘i D.U. hamda uning o‘rinbosari S.B. bilan mehnat shartnomasi bekor qilindi. Holat yuzasidan tergov harakatlari davom etmoqda.
Kambag‘allikni qisqartirish va bandlik vazirligining Andijon viloyati boshqarmasi axborot xizmati rasmdagi shaxs boshqarmaning Andijon shahar bo‘limi boshlig‘i ekanini tasdiqlagan edi.
Kambag‘allikni qisqartirish va bandlik vazirligi axborot xizmati rahbari Gulnoza Alimova voqeadan xabardorligini, holatga aniqlik kiritishga urinayotganini ochiqladi.
O‘rganyapmiz, dedi u tahririyatning bu haqdagi savoliga qisqa javob berar ekan.
Ichki ishlar vazirligi axborot xizmatining qo‘shimcha qilishicha, o‘tkazilgan tezkor-qidiruv tadbiri jarayonida fuqarodan jami 0,69 gr gashish giyohvandlik moddasi olingan. Hozirda holat yuzasidan Andijon shahar IIO FMB tomonidan Jinoyat kodeksining 276-moddasi 1-qismi bilan jinoyat ishi qo‘zg‘atilgan. Tergov harakatlari olib borilmoqda.
“Daryo”da mazkur vazirlik xodimlari harakati bilan soxta ish o‘rinlari yaratilayotgani, fuqarolarning shaxsiy ma’lumotlari internetda sizdirilayotgani haqida so‘z yuritilgan maqola e’lon qilingandi.
Izoh (0)